નવી દિલ્હી:  ભારતીય રાજકારણમાં ક્યારે કયા પક્ષનું પલ્લું નમી જાય તે કહેવું મુશ્કેલ છે, પરંતુ સી-વોટરના તાજેતરના 'મૂડ ઓફ ધ નેશન' (MOTN) સર્વેએ રાજકીય ગલિયારાઓમાં ખળભળાટ મચાવી દીધો છે. જો આજે લોકસભાની ચૂંટણી યોજાય, તો વડાપ્રધાન નરેન્દ્ર મોદીની લોકપ્રિયતાના જોરે ભાજપના નેતૃત્વ હેઠળનું NDA ગઠબંધન ૩૫૨ બેઠકો સાથે પ્રચંડ બહુમતી મેળવતું દેખાઈ રહ્યું છે. ૨૦૨૪ની ચૂંટણીમાં ભાજપ ૨૪૦ બેઠકો પર અટકી ગયું હતું, પરંતુ આ સર્વે મુજબ ભાજપ અત્યારે ૨૮૭ બેઠકો સાથે પોતાના દમ પર સરકાર બનાવવાની સ્થિતિમાં છે. આ આંકડા દર્શાવે છે કે જનતાનો ભરોસો પીએમ મોદી પર હજુ પણ અકબંધ છે.

વિપક્ષી ગઠબંધન 'INDIA' માટે આ સર્વેના પરિણામો થોડા ચિંતાજનક હોઈ શકે છે. સર્વે અનુસાર, વિપક્ષી ગઠબંધન ૧૮૨ બેઠકો પર સમેટાઈ શકે છે. સૌથી મોટો ફટકો કોંગ્રેસને પડવાની સંભાવના છે, જેની બેઠકોની સંખ્યા ૨૦૨૪ની ૯૯ થી ઘટીને ૮૦ પર આવી શકે છે. મત ટકાવારીની દ્રષ્ટિએ જોઈએ તો, NDA ને ૪૭ ટકા જેટલો મોટો જનાદેશ મળવાની ધારણા છે, જ્યારે ઇન્ડિયા ગઠબંધન ૩૯ ટકા મતો મેળવી શકે છે. અન્ય પ્રાદેશિક પક્ષો અને અપક્ષોના ફાળે ૧૪ ટકા મત અને અંદાજે ૯ બેઠકો જવાની શક્યતા છે.

આ સર્વેના તારણો પાછળ સરકારની તાજેતરની નીતિઓ અને વૈશ્વિક સ્તરે ભારતની વધતી પ્રતિષ્ઠા મુખ્ય કારણ મનાય છે. ૨૦૨૪માં ટીડીપી અને જેડીયુ જેવા સાથી પક્ષો પર નિર્ભર રહેલા ભાજપ માટે આ 'કાલ્પનિક ચૂંટણી'ના પરિણામો રાહત આપનારા છે. જોકે, રાજકારણમાં જમીની હકીકત અને સર્વેના આંકડામાં ઘણીવાર તફાવત જોવા મળતો હોય છે, છતાં આ સર્વેએ વિપક્ષોને ફરીથી પોતાની રણનીતિ પર વિચાર કરવા મજબૂર કર્યા છે. પીએમ મોદીની લોકપ્રિયતાનો ગ્રાફ ફરીથી ઉંચે જવો એ ૨૦૨૯ની તૈયારીઓ માટે ભાજપ માટે એક મોટું બૂસ્ટર ડોઝ સાબિત થઈ શકે છે.