નવી દિલ્હી: કેન્દ્રીય બજેટ ૨૦૨૬-૨૭ રજૂ થાય તે પહેલાં સંસદમાં 'ઈકોનોમિક સર્વે ૨૦૨૫-૨૬' રજૂ કરવામાં આવ્યો છે. આ દસ્તાવેજ સરકારના પાછલા વર્ષના ખર્ચનો હિસાબ તો આપે જ છે, પરંતુ સાથે સાથે આગામી સમયમાં અર્થતંત્ર કઈ દિશામાં જશે તેના સ્પષ્ટ સંકેતો પણ આપે છે. આ વખતના સર્વેમાં સૌથી વધુ ચર્ચા સોનાના ભાવો અને આયાત ડ્યુટી પર કરવામાં આવી છે, જે સામાન્ય જનતા માટે સીધી અસર કરતા સમાચાર છે.
ઈકોનોમિક સર્વેમાં સોના પરના ટેક્સ માળખા અને વૈશ્વિક બજારમાં તેની વધતી કિંમતોનો ખાસ ઉલ્લેખ કરવામાં આવ્યો છે. નિષ્ણાતો માની રહ્યા છે કે જો સરકાર આયાત ડ્યુટીમાં ઘટાડો કરે તો સોનું સસ્તું થઈ શકે છે. જોકે, બીજી તરફ સામાન્ય જનતામાં વધતી મોંઘવારીને લઈને આક્રોશ પણ જોવા મળી રહ્યો છે. સોશિયલ મીડિયા પર લોકો પ્રતિક્રિયા આપી રહ્યા છે કે મધ્યમ વર્ગ માટે હવે સોનું ખરીદવું એ સપનું બની રહ્યું છે.
 સર્વે મુજબ ભારતીય અર્થતંત્ર પ્રગતિના પંથે છે, પરંતુ વધતી જતી આર્થિક અસમાનતા એક મોટો પડકાર છે. રિપોર્ટમાં જણાવવામાં આવ્યું છે કે ઉદ્યોગપતિઓનો નફો વધી રહ્યો છે, પરંતુ ગરીબ અને મધ્યમ વર્ગ સુધી આ વિકાસના ફળ પૂરેપૂરા પહોંચી રહ્યા નથી. બજેટમાં સરકાર ટેક્સમાં રાહત આપીને સામાન્ય માનવીના હાથમાં વધુ નાણાં છોડશે કે કેમ, તે હવે ૧ ફેબ્રુઆરીએ જ ખબર પડશે.
સોશિયલ મીડિયા પર 'ખર્ચા પાની' જેવા કાર્યક્રમો દ્વારા લોકો પોતાની વેદના ઠાલવી રહ્યા છે કે માત્ર જાહેરાતોમાં જ વિકાસ થઈ રહ્યો છે કે ખરેખર જમીની સ્તરે પણ પરિવર્તન આવશે? હવે આ તમામ સવાલોના જવાબ નાણામંત્રીના બજેટ પિટારામાં છુપાયેલા છે.