નવી દિલ્હી : ભારતીય વિમાનમથકો પર વધતી જતી ટ્રાફિક સમસ્યાને હળવી કરવા માટે એરપોર્ટ ઓથોરિટી ઓફ ઈન્ડિયા (એએઆઈ)એ એક મોટી યોજના જાહેર કરી છે. એએઆઈ આગામી સમયમાં એર ટ્રાફિક કંટ્રોલ (એટીસી) સિસ્ટમને સંપૂર્ણપણે ઓટોમેટિક અને એઆઈ-સંચાલિત બનાવવા માટે ૧૫,૦૦૦ કરોડ રૂપિયાનું જંગી રોકાણ કરશે. આ નવી સિસ્ટમથી વિમાનોના લેન્ડિંગ અને ટેક-ઓફમાં ચોકસાઈ વધશે અને ફ્લાઈટના વિલંબમાં ઘટાડો થશે. આધુનિક ટેકનોલોજીના ઉપયોગથી એરસ્પેસની ક્ષમતા વધશે અને સુરક્ષાના માપદંડો વધુ મજબૂત બનશે. આ પ્રોજેક્ટ હેઠળ દેશના મુખ્ય એરપોર્ટ્સ પર નવી રડાર સિસ્ટમ અને કોમ્યુનિકેશન સાધનો પણ લગાવવામાં આવશે.