​વર્ષ ૨૦૨૬ના ફેબ્રુઆરી મહિનામાં આકાશમાં એક અદભૂત ખગોળીય ઘટના જોવા મળશે. ૧ ફેબ્રુઆરીની રાત્રે ચંદ્ર તેની પૂર્ણ કળાએ ખીલશે, જેને 'સ્નો મૂન' તરીકે ઓળખવામાં આવે છે. ન્યૂઝવીકના રિપોર્ટ અને ઓલ્ડ ફાર્મર્સ અલ્માનિક મુજબ, આ નામ સદીઓ જૂનું છે અને તેનો સીધો સંબંધ ફેબ્રુઆરી મહિનામાં થતી ભારે હિમવર્ષા સાથે છે. ૧૭૬૦ના દાયકામાં કેપ્ટન જોનાથન કાર્વર દ્વારા આ નામનો ઉલ્લેખ કરવામાં આવ્યો હતો.

​નાસાના જણાવ્યા અનુસાર, જ્યારે ચંદ્ર પૃથ્વીની આસપાસ ફરતા સૂર્યની બરાબર વિરુદ્ધ દિશામાં હોય છે ત્યારે પૂર્ણિમા થાય છે. ૧ ફેબ્રુઆરીના રોજ સાંજે ૫:૦૯ વાગ્યે ચંદ્ર તેની મહત્તમ ચમક પર હશે. આ સમયે ચંદ્ર ક્ષિતિજની નજીક હોવાથી એક ઓપ્ટિકલ ભ્રમણા સર્જાય છે જેને 'મૂન ઈલ્યુઝન' કહેવાય છે, જેના કારણે ચંદ્ર તેના વાસ્તવિક કદ કરતા ઘણો મોટો દેખાય છે.

​ખગોળશાસ્ત્રીઓના મતે, આ નજારો માણવા માટે શહેરના પ્રકાશ અને પ્રદૂષણથી દૂર જવું હિતાવહ છે. આ દિવસે સૂર્યાસ્ત સમયે પૂર્વ દિશામાં ચંદ્ર ક્ષિતિજથી ઉપર આવતો જોવા મળશે, જે કર્ક તારામંડળની નજીક દેખાશે. આ ઉપરાંત, 'અર્થશાઈન' પ્રભાવને કારણે ચંદ્રના અંધારા ભાગમાં પણ હલકી ચમક જોવા મળી શકે છે.