બફેલો, તા.૩૦: અમેરિકન ફૂટબોલની દુનિયામાં અત્યારે એક જ નામની ચર્ચા છે અને તે છે જો બ્રેડી. બફેલો બિલ્સે સીન મેકડર્મોટના સ્થાને જ્યારે ૩૬ વર્ષના યુવાન જો બ્રેડીને હેડ કોચ તરીકે નિયુક્ત કર્યા, ત્યારે ચાહકોમાં કુતૂહલ જાગ્યું હતું. પરંતુ આ કુતૂહલ માત્ર જો બ્રેડી પૂરતું મર્યાદિત નથી, લોકો હવે તેમની પત્ની લોરેન બ્રેડી વિશે જાણવા પણ આતુર છે. લોરેન માત્ર એક કોચની પત્ની નથી, પણ સંઘર્ષ અને સફળતાની એક જીવતી જાગતી મિસાલ છે.
જો અને લોરેનના લગ્ન ૨૫ જૂન, ૨૦૨૨ના રોજ કેલિફોર્નિયાની સુંદર વાઇનરીમાં થયા હતા. આ દંપતીને બે નાના બાળકો છે. જો કે, લોરેનની ઓળખ તેનાથી પણ વિશેષ છે. એક સમયે ગૂગલ અલ્ગોરિધમમાં ફેરફારને કારણે પોતાનો ફિટનેસ બિઝનેસ ગુમાવનાર લોરેને હાર ન માની. તેણે સંગીત ક્ષેત્રે ઝંપલાવ્યું અને આજે તે એક જાણીતી ગિટાર ઇન્સ્ટ્રક્ટર છે.
લોરેન બ્રેડીની સફળતાની ગાથા કોઈ ફિલ્મથી ઓછી નથી. ૨૦૨૦ના લોકડાઉન દરમિયાન જ્યારે ઘણાના વ્યવસાયો ઠપ થઈ રહ્યા હતા, ત્યારે લોરેને યુટ્યુબ (YouTube) પર ધ્યાન કેન્દ્રિત કર્યું. શરૂઆતમાં ટીકાઓનો સામનો કરવા છતાં, આજે તેની પાસે ૬ લાખથી વધુ સબ્સ્ક્રાઇબર્સ છે અને તેના વીડિયોને ૫ કરોડથી વધુ વ્યૂઝ મળ્યા છે. આજે તે પોતાના ઓનલાઇન સંગીત શિક્ષણ દ્વારા દર મહિને લાખો રૂપિયાની કમાણી કરે છે.
જ્યારે જો બ્રેડીને હેડ કોચ તરીકે રજૂ કરવામાં આવ્યા, ત્યારે તેમણે ભાવુક થઈને પોતાની સફળતાનો તમામ શ્રેય પત્ની લોરેનને આપ્યો હતો. બફેલો બિલ્સના ચાહકોને આશા છે કે જે રીતે લોરેને મુશ્કેલીઓ સામે લડીને વિજય મેળવ્યો છે, તેવી જ રીતે જો બ્રેડી પણ બિલ્સની ટીમને સુપર બાઉલ સુધી લઈ જવામાં સફળ રહેશે.