ડિબ્રુગઢ, તા.૩૦: આસામના સાંસ્કૃતિક પ્રતીક 'ગમછા' (પરંપરાગત સ્કાર્ફ) ને લઈને હવે દેશનું રાજકારણ ગરમાયું છે. કેન્દ્રીય ગૃહમંત્રી અમિતભાઈ શાહે ડિબ્રુગઢમાં એક જાહેર સભા દરમિયાન રાહુલ ગાંધી પર આકરા પ્રહારો કર્યા હતા. તેમણે સવાલ ઉઠાવ્યો હતો કે રાષ્ટ્રપતિના પ્રજાસત્તાક દિવસના સ્વાગત સમારંભમાં રાહુલ ગાંધીએ ગમછા કેમ ન પહેર્યો? શાહે પૂછ્યું કે, "રાહુલ ગાંધીને પૂર્વોત્તરની સંસ્કૃતિ સાથે એવી તે કેવી દુશ્મનાવટ છે?"
અમિતભાઈ શાહે વડાપ્રધાન નરેન્દ્ર મોદીનું ઉદાહરણ આપતા કહ્યું કે, પીએમ મોદીએ આંતરરાષ્ટ્રીય મંચો અને સંયુક્ત રાષ્ટ્રમાં પણ આસામી ગમછા પહેરીને રાજ્યનું માન વધાર્યું છે. તેમણે આસામ કોંગ્રેસના નેતૃત્વને પણ આડે હાથ લેતા પૂછ્યું કે આસામી પરંપરાના આ અનાદર પર સ્થાનિક કોંગ્રેસના નેતાઓ મૌન કેમ સેવી રહ્યા છે? જોકે, કોંગ્રેસે આ આરોપોને ફગાવતા કહ્યું હતું કે રાહુલ ગાંધીએ શરૂઆતમાં પટકા પહેર્યો હતો, પરંતુ બાદમાં તે ઉતારી દીધો હતો. ભાજપ આ મુદ્દે ખોટું રાજકારણ રમી રહી હોવાનો પણ કોંગ્રેસે દાવો કર્યો છે.
 
ડિબ્રુગઢ બનશે આસામની બીજી રાજધાની
રાજકીય વિવાદોની સાથે અમિતભાઈ શાહે આસામ સરકારની સિદ્ધિઓના પણ વખાણ કર્યા હતા. તેમણે હિમંત બિસ્વા શર્મા સરકારના નિર્ણયની પ્રશંસા કરતા જણાવ્યું કે:
•    ડિબ્રુગઢ હવે સત્તાવાર રીતે આસામની બીજી રાજધાની તરીકે ઓળખાશે.
•    ૨૫૦ એકર જમીન પર નવા વિધાનસભા સંકુલનો શિલાન્યાસ કરવામાં આવ્યો છે.
•    આ નિર્ણયથી ડિબ્રુગઢની રાજકીય અને વહીવટી ઓળખ રાષ્ટ્રીય સ્તરે મજબૂત બનશે.
આ ઉપરાંત, અમિતભાઈ શાહે કોંગ્રેસ પર વોટબેંકના રાજકારણ માટે ગેરકાયદેસર ઈમિગ્રેશનને પ્રોત્સાહન આપવાનો પણ ગંભીર આરોપ લગાવ્યો હતો. તેમણે સ્પષ્ટ કર્યું કે ગમે તેટલા વિવાદો થાય, પરંતુ પૂર્વોત્તરની સંસ્કૃતિ હંમેશા ખીલતી રહેશે.