કારાકાસ, તા.૩૦: દક્ષિણ અમેરિકાના તેલ સમૃદ્ધ દેશ વેનેઝુએલામાં આજે એક મોટો રાજકીય અને આર્થિક ભૂકંપ આવ્યો છે. દેશના કાર્યકારી રાષ્ટ્રપતિ ડેલ્સી રોડ્રિગ્ઝે વેનેઝુએલાના તેલ ક્ષેત્રને ખાનગી રોકાણકારો માટે ખુલ્લું મુકતા એક ઐતિહાસિક કાયદા પર હસ્તાક્ષર કર્યા છે. આ પગલું છેલ્લા બે દાયકાથી વધુ સમયથી દેશમાં ચાલી રહેલી સમાજવાદી વિચારધારા અને નીતિઓથી બિલકુલ વિપરીત છે, જે અત્યાર સુધી તેલ ક્ષેત્ર પર માત્ર રાજ્યના એકાધિકારમાં માનતી હતી.

રસપ્રદ વાત એ છે કે, આ આર્થિક પરિવર્તન એવા સમયે આવ્યું છે જ્યારે એક મહિના પહેલા જ અમેરિકી લશ્કરી હુમલામાં તત્કાલીન રાષ્ટ્રપતિ નિકોલસ માદુરોને સત્તા પરથી હટાવવામાં આવ્યા હતા. રોડ્રિગ્ઝે નેશનલ એસેમ્બલી (રાષ્ટ્રીય સભા) દ્વારા મંજૂરી મળ્યાની માત્ર બે જ કલાકમાં આ બિલ પર મહોર લગાવી દીધી હતી, જે આ પરિવર્તનની ગતિ અને તાકીદ દર્શાવે છે.

ટ્રમ્પ વહીવટીતંત્ર સાથે તેલ સોદાની તૈયારી

આ કાયદા પર હસ્તાક્ષર કરતા પહેલા ડેલ્સી રોડ્રિગ્ઝે અમેરિકી રાષ્ટ્રપતિ ડોનાલ્ડ ટ્રમ્પ અને સેક્રેટરી ઓફ સ્ટેટ માર્કો રુબિયો સાથે મહત્વપૂર્ણ ચર્ચાઓ કરી હતી. માર્કો રુબિયોએ અગાઉ અમેરિકી સેનેટમાં સ્પષ્ટ કર્યું હતું કે વહીવટીતંત્ર વેનેઝુએલાના લાખો બેરલ તેલના વેચાણ અને વહીવટને હેન્ડલ કરવા માટે તૈયાર છે.

વિશ્વમાં ક્રૂડ ઓઈલનો સૌથી મોટો ભંડાર ધરાવતા વેનેઝુએલા માટે આ નિર્ણય ગેમ-ચેન્જર સાબિત થઈ શકે છે. નિષ્ણાતો માને છે કે આ ખાનગીકરણથી વેનેઝુએલાની જર્જરિત અર્થવ્યવસ્થામાં ફરીથી પ્રાણ ફૂંકાશે અને વૈશ્વિક તેલ બજારમાં પણ તેની મોટી અસર જોવા મળશે. લાંબા સમયથી અમેરિકાના પ્રતિબંધો અને આંતરિક ખેંચતાણનો સામનો કરી રહેલું વેનેઝુએલા હવે પશ્ચિમી રોકાણકારો માટે લાલ જાજમ બિછાવી રહ્યું છે.