મુંબઈ, તા.૩૦: વૈશ્વિક સ્તરે જાણીતી એતિહાદ એરવેઝે ભારતીય બજારમાં પોતાનો દબદબો વધારવા માટે એક માસ્ટરસ્ટ્રોક રમ્યો છે. એરલાઇને તેના લોયલ્ટી પ્રોગ્રામ ‘એતિહાદ ગેસ્ટ’ (Etihad Guest) હેઠળ ભારતના પાંચ દિગ્ગજ ભાગીદારો – BOBCARD, Flipkart, Swiggy, Shoppers Stop અને The Postcard Hotel સાથે જોડાણ કર્યું છે. આ ભાગીદારીનો અર્થ એ છે કે હવે ભારતીય ગ્રાહકો રોજિંદા ખર્ચ પર માઇલ્સ કમાઈ શકશે અને તેનો ઉપયોગ સસ્તામાં મુસાફરી કરવા માટે કરી શકશે.

ભારત અત્યારે એતિહાદ માટે સૌથી ઝડપથી વિકસતું બજાર છે. એરલાઇનના ચીફ કોમર્શિયલ ઓફિસર એરિક ડેએ જણાવ્યું કે, ભારતભરના ૧૧ શહેરોમાં દર અઠવાડિયે ૧૮૫ ફ્લાઇટ્સ સાથે એતિહાદ મજબૂત પકડ ધરાવે છે. હવે તેઓ ઇચ્છે છે કે ભારતીય ગ્રાહકો માત્ર મુસાફરી કરતી વખતે જ નહીં, પણ ઓનલાઇન સામાન મંગાવતી વખતે કે કપડાં ખરીદતી વખતે પણ રિવોર્ડ્સ મેળવે.

ગ્રાહકોને કઈ રીતે થશે મોટો ફાયદો?

· Flipkart & Swiggy: હવે તમે ફ્લિપકાર્ટના ‘સુપરકોઈન્સ’ને એતિહાદ માઇલ્સમાં બદલી શકશો. એટલું જ નહીં, સ્વિગી દ્વારા ખાવાનું મંગાવવા કે ગ્રોસરી ખરીદવા પર પણ માઇલ્સ મળશે અને ૬ મહિનાની ‘Swiggy One’ મેમ્બરશિપ ફ્રી મળશે.

· BOBCARD: બેંક ઓફ બરોડા સાથે મળીને એરલાઇને ખાસ ક્રેડિટ કાર્ડ લોન્ચ કર્યું છે. જો તમે ૨૮ ફેબ્રુઆરી પહેલા આ કાર્ડ લેશો, તો તમને બમણા ‘વેલકમ માઇલ્સ’ મળશે.

· Shoppers Stop: શોપર્સ સ્ટોપના ગ્રાહકોને એક વર્ષ માટે મફત ‘પ્લેટિનમ સ્ટેટસ’ મળશે, જેનાથી શોપિંગનો અનુભવ વધુ લક્ઝરી બનશે.

· The Postcard Hotel: જો તમે ભારત, ભૂટાન કે શ્રીલંકામાં આ હોટલમાં રોકાશો, તો ૨,૦૦૦ થી ૪,૦૦૦ માઇલ્સની સાથે એક રાતનું ફ્રી સ્ટે પણ મળી શકે છે.

એતિહાદનો લક્ષ્ય સ્પષ્ટ છે – તમારા રોજિંદા જીવનની જરૂરિયાતોને તમારી મુસાફરીના સપના સાથે જોડવી. હવે જ્યારે તમે ઘરની ગ્રોસરી ઓર્ડર કરશો કે નવા કપડાં ખરીદશો, ત્યારે તમે અજાણતા જ તમારી આગામી વિદેશ યાત્રા માટે ટિકિટના પૈસા બચાવી રહ્યા હશો!