બેંગલુરુ: કર્ણાટકમાં હવે સરકારી કચેરીઓનો માહોલ બદલાવા જઈ રહ્યો છે. રાજ્યના સરકારી કર્મચારીઓએ સ્વદેશી અને સ્થાનિક ઉદ્યોગોને પ્રોત્સાહન આપવા માટે એક અનોખો નિર્ણય લીધો છે. જે મુજબ, ૨૧ એપ્રિલ ૨૦૨૬થી રાજ્યના તમામ સરકારી કર્મચારીઓ દર મહિનાના પ્રથમ શનિવારે સ્વેચ્છાએ ખાદીના પોશાકમાં સજ્જ થઈને ઓફિસ આવશે.

કર્ણાટક રાજ્ય સરકારી કર્મચારી સંગઠન દ્વારા લેવામાં આવેલા આ નિર્ણયને મુખ્ય સચિવ ડૉ. શાલિની રજનીશની અધ્યક્ષતામાં મળેલી બેઠકમાં પણ સમર્થન મળ્યું છે. આ પહેલમાં માત્ર સરકારી વિભાગો જ નહીં, પરંતુ વિવિધ બોર્ડ, કોર્પોરેશન, યુનિવર્સિટીઓ અને સરકારી સહાય મેળવતી સંસ્થાઓના કર્મચારીઓ પણ જોડાશે.

ખાસ ડિસ્કાઉન્ટ અને ડ્રેસ કોડની તૈયારી

કર્મચારીઓને ખાદી તરફ આકર્ષવા માટે સરકારે વિશેષ આર્થિક રાહતની પણ જાહેરાત કરી છે:

· વધારાનું ડિસ્કાઉન્ટ: ખાદી ગ્રામોદ્યોગ બોર્ડના આઉટલેટ્સ પર મળતી નિયમિત છૂટ ઉપરાંત સરકારી કર્મચારીઓને કાર્ડ બતાવવા પર વધારાનું ૫% ડિસ્કાઉન્ટ આપવામાં આવશે.

· પુરુષો અને મહિલાઓ માટે વિકલ્પ: પુરુષ કર્મચારીઓને ખાદીના શર્ટ, પેન્ટ કે ઓવરકોટ અને મહિલા કર્મચારીઓને ખાદીની સાડી અથવા ચૂડીદાર પહેરવા પ્રોત્સાહિત કરવામાં આવશે.

· કેન્ટીનની માંગ: આ સાથે જ એસોસિએશને આર્મી કેન્ટીનની જેમ સરકારી કર્મચારીઓ માટે પણ સસ્તા દરે વસ્તુઓ મળી રહે તેવી કેન્ટીન સુવિધા શરૂ કરવા બજેટમાં માંગ કરી છે.

સંગઠનના પ્રમુખ સી.એસ. શદાક્ષરીએ જણાવ્યું હતું કે, આ પગલાથી માત્ર પર્યાવરણને જ ફાયદો નહીં થાય, પરંતુ ગ્રામીણ વિસ્તારોમાં ખાદી વણતા હજારો કારીગરોને સીધી આર્થિક મદદ મળશે. કર્ણાટકની આ પહેલ દેશના અન્ય રાજ્યો માટે પણ પ્રેરણારૂપ બની શકે છે.