વારાણસી: પ્રયાગરાજ માઘ મેળામાંથી વારાણસી પરત ફરેલા શંકરાચાર્ય સ્વામી અવિમુક્તેશ્વરાનંદે ઉત્તર પ્રદેશના મુખ્યમંત્રી યોગી આદિત્યનાથ સામે મોરચો ખોલી દીધો છે. વારાણસીના વિદ્યા મઠમાં આયોજિત પત્રકાર પરિષદમાં તેમણે મુખ્યમંત્રીને ૪૦ દિવસનું અલ્ટીમેટમ આપતા કહ્યું કે, જો તેમની શરતો પૂરી નહીં થાય તો તેઓ યોગી આદિત્યનાથને ‘નકલી હિન્દુ’ જાહેર કરી દેશે.
આ વિવાદ ત્યારે વકર્યો જ્યારે વહીવટીતંત્ર દ્વારા સ્વામી અવિમુક્તેશ્વરાનંદ પાસે તેમના શંકરાચાર્ય હોવાનું પ્રમાણપત્ર માંગવામાં આવ્યું હતું. આ બાબતે રોષે ભરાયેલા શંકરાચાર્યે વળતો પ્રહાર કરતા મુખ્યમંત્રીના હિન્દુ હોવા પર જ સવાલ ઉઠાવ્યા છે અને તેમને પોતાનું ‘હિન્દુત્વ’ સાબિત કરવા પડકાર ફેંક્યો છે.
 શું છે શંકરાચાર્યની મુખ્ય માંગણીઓ?
સ્વામી અવિમુક્તેશ્વરાનંદે સરકાર સામે બે મુખ્ય શરતો મૂકી છે:
• ગૌમાતાને સન્માન: ઉત્તર પ્રદેશ સરકાર ગૌમાતાને તાત્કાલિક અસરથી ‘રાજ્યમાતા’નો દરજ્જો આપે.
• માંસ નિકાસ પર પ્રતિબંધ: રાજ્યમાં માંસની નિકાસ પર સંપૂર્ણપણે પ્રતિબંધ મૂકવામાં આવે અને ગૌહત્યા બંધ થાય.
શંકરાચાર્યે સ્પષ્ટપણે જણાવ્યું છે કે, “જો ૧૦-૧૧ માર્ચ સુધીમાં સરકાર આ બાબતે કોઈ નક્કર કાર્યવાહી નહીં કરે, તો લખનઉમાં સંતોના મહાસંગમ વચ્ચે મોટો નિર્ણય લેવામાં આવશે.” તેમણે વધુમાં ઉમેર્યું કે, ગૌરક્ષા એ હિન્દુ હોવાની પ્રાથમિક શરત છે અને જો મુખ્યમંત્રી આમાં નિષ્ફળ જશે તો તેમને હિન્દુ કહેવાનો કોઈ અધિકાર નથી.
આ અલ્ટીમેટમ બાદ ઉત્તર પ્રદેશના રાજકારણમાં અને ધાર્મિક જગતમાં ખળભળાટ મચી ગયો છે. શંકરાચાર્યના આ કડક વલણને કારણે આગામી દિવસોમાં સરકાર અને સંતો વચ્ચે ઘર્ષણ વધવાની પૂરેપૂરી શક્યતા છે. યોગી આદિત્યનાથ જેમને ‘હિન્દુ હૃદય સમ્રાટ’ માનવામાં આવે છે, તેમની સામે જ એક સર્વોચ્ચ ધર્મગુરુએ મોરચો ખોલતા આ લડાઈ હવે વ્યક્તિગત પ્રતિષ્ઠાનો વિષય બની ગઈ છે.