મુંબઈ : ચાંદીના રોકાણકારો માટે શુક્રવારનો દિવસ ‘બ્લેક ફ્રાઈડે’ સાબિત થયો છે. મલ્ટી કોમોડિટી એક્સચેન્જ (MCX) પર ચાંદીના ભાવમાં એટલો ભયાનક ઘટાડો થયો કે બજારમાં ૧૫% ની નીચલી સર્કિટ (Lower Circuit) લગાડવી પડી હતી. ગઈકાલે જે ચાંદી ₹૪.૨૦ લાખ પ્રતિ કિલોગ્રામના ઐતિહાસિક સ્તરે પહોંચી હતી, તે આજે નફાખોરીને કારણે ગબડીને ₹૩.૯૯ લાખની આસપાસ બંધ થઈ છે.
વૈશ્વિક બજારમાં અમેરિકી ડોલરની રિકવરી અને નવા ફેડ ચેરમેનની નિમણૂકના સંકેતો વચ્ચે સોના-ચાંદીમાં આક્રમક વેચવાલી જોવા મળી છે. નિષ્ણાતો માને છે કે આટલી મોટી તેજી પછી બજારમાં કરેક્શન આવવું સ્વાભાવિક હતું, પરંતુ ૧૫% નો ઘટાડો બજારની અસ્થિરતા દર્શાવે છે.
વિશ્લેષકોના ૩ મુખ્ય તારણો: બજારના નિષ્ણાતો આ ઘટાડા પાછળ નીચેના કારણો જવાબદાર ગણાવી રહ્યા છે:
ચાંદીના ભાવ છેલ્લા ૧૨ મહિનામાં ૧૭૦% જેટલા વધ્યા છે. ₹૪.૨૦ લાખના ઓલ-ટાઇમ હાઈ સ્તરે પહોંચ્યા બાદ મોટા રોકાણકારોએ નફો વસૂલવાનું શરૂ કરતા ભાવ પટકાયા હતા.
 અમેરિકી ડોલરમાં સુધારો થતા આંતરરાષ્ટ્રીય બજાર (COMEX) માં ચાંદીનો વાયદો ૪% ઘટીને ૧૧૦ ડોલર પ્રતિ ઔંસ પર આવી ગયો હતો, જેની સીધી અસર ભારતીય બજાર પર પડી.
ઘરેલું બજારમાં ભાવ આંતરરાષ્ટ્રીય સ્તર કરતા વધુ ઉંચા હતા, જે તફાવત ઘટતા ભાવમાં મોટો ઘટાડો નોંધાયો છે.
મોતીલાલ ઓસ્વાલ અને ઇન્ડસઇન્ડ સિક્યોરિટીઝના વિશ્લેષકોના મતે, આ માત્ર એક ટૂંકા ગાળાનું કરેક્શન છે. જાન્યુઆરી મહિનામાં જ ચાંદી ૫૦% થી વધુ વધી છે, જે ઈતિહાસનું સૌથી મજબૂત પ્રદર્શન છે. સોલર પેનલ, ઇલેક્ટ્રોનિક્સ અને ઇન્ડસ્ટ્રીયલ સેક્ટરમાં ચાંદીની માંગ સતત વધી રહી છે. જો કે, અત્યંત અસ્થિરતાને જોતા રોકાણકારોએ એકસાથે મોટી રકમ રોકવાને બદલે ટુકડે-ટુકડે રોકાણ કરવાની સલાહ આપવામાં આવી છે. ભૂ-રાજકીય તણાવ અને વૈશ્વિક અનિશ્ચિતતા હજુ પણ સોના-ચાંદી માટે પોઝિટિવ છે, જે લાંબા ગાળે ભાવને ફરીથી ઉપર તરફ ખેંચી શકે છે