નવી દિલ્હી:દેશભરમાં હવામાનની પેટર્ન એકાએક બદલાઈ ગઈ છે. એક તરફ જ્યાં ઉત્તર ભારતના રાજ્યો ઠંડીમાં થરથર કાંપી રહ્યા છે, ત્યાં બીજી તરફ ભારતીય હવામાન વિભાગ (IMD) એ આગામી ચાર દિવસ માટે દેશના અનેક રાજ્યોમાં ભારે વરસાદની ચેતવણી જારી કરી છે. ૨૦૨૫ ના ઐતિહાસિક વરસાદ બાદ હવે ૨૦૨૬ ની શરૂઆત પણ વરસાદી માહોલ સાથે થઈ રહી છે, જેણે ખેડૂતો અને સામાન્ય જનતાની ચિંતા વધારી દીધી છે.
હવામાન વિભાગના જણાવ્યા અનુસાર, વેસ્ટર્ન ડિસ્ટર્બન્સના કારણે પહાડી વિસ્તારોમાં હિમવર્ષા અને મેદાની પ્રદેશોમાં ગાજવીજ સાથે વરસાદની શક્યતા છે. ખાસ કરીને દક્ષિણ અને ઉત્તર ભારતના રાજ્યોમાં તેની સૌથી વધુ અસર જોવા મળશે.
દક્ષિણ ભારત: કેરળમાં મેઘરાજા હજુ વિરામ લેવાના મૂડમાં નથી. આગામી ચાર દિવસ કેરળ, તમિલનાડુ, પુડુચેરી અને લક્ષદ્વીપમાં ભારે પવન અને વાવાઝોડા સાથે મુશળધાર વરસાદ પડી શકે છે.
પહાડી વિસ્તારો: ઉત્તરાખંડ, હિમાચલ પ્રદેશ, જમ્મુ-કાશ્મીર અને લદ્દાખમાં ૩૧ જાન્યુઆરીથી ૨ ફેબ્રુઆરી દરમિયાન ભારે વરસાદ અને હિમવર્ષા (Snowfall) ની ચેતવણી આપવામાં આવી છે. પ્રવાસીઓને સાવધ રહેવા સૂચના અપાઈ છે.
ઉત્તર અને મધ્ય ભારત: પંજાબ, હરિયાણા અને ઉત્તર પ્રદેશમાં ૧ થી ૩ ફેબ્રુઆરી દરમિયાન વરસાદની શક્યતા છે. જ્યારે રાજસ્થાનમાં ૩૧ જાન્યુઆરી અને ૧ ફેબ્રુઆરીએ વરસાદની સાથે કરા પાડવાની પણ આગાહી છે. મધ્યપ્રદેશમાં પણ આગામી કેટલાક દિવસો સુધી વાદળછાયું વાતાવરણ રહેશે.
 માત્ર ઉત્તર કે દક્ષિણ જ નહીં, પરંતુ પૂર્વોત્તર ભારત પણ આ વરસાદી સિસ્ટમની લપેટમાં છે. અરુણાચલ પ્રદેશ, આસામ અને મેઘાલયમાં આગામી ચાર દિવસ ભારે વરસાદની ચેતવણી જારી કરવામાં આવી છે. અચાનક બદલાયેલા આ વાતાવરણને કારણે ઠંડીના જોરમાં વધારો થઈ શકે છે, સાથે જ લણણીના આરે ઉભેલા પાકને નુકસાન થવાની ભીતિ પણ સેવાઈ રહી છે