મુલુગ (તેલંગાણા) : તેલંગાણા સરકારે ભક્તિ અને શ્રદ્ધાના પ્રતીક સમાન વિશ્વ વિખ્યાત ‘શ્રી સમ્ક્કા-સરલમ્મા મહાજાતરા’ને સત્તાવાર રીતે ‘રાજ્ય ઉત્સવ’ જાહેર કરીને આદિવાસી સંસ્કૃતિનું સન્માન કર્યું છે. મુલુગ જિલ્લાના મેદારમ ગામમાં દર બે વર્ષે યોજાતા આ અનોખા મેળામાં અત્યારે શ્રદ્ધાનો મહાસાગર હિલોળા લઈ રહ્યો છે. આ જાતરાને એશિયાનો સૌથી મોટો આદિવાસી ઉત્સવ માનવામાં આવે છે, જેમાં લાખોની સંખ્યામાં લોકો વનદેવીઓના દર્શનાર્થે આવે છે.

આ દિવસોમાં મેદારમના જંગલોમાં પરંપરાગત વિધિઓ સાથે ઉત્સવની ધૂમ મચી છે. ભક્તોમાં એવી અતૂટ શ્રદ્ધા છે કે વનદેવી સમ્ક્કા અને સરલમ્માના આશીર્વાદથી જીવનમાં શાંતિ, સુખ અને સમૃદ્ધિ આવે છે.
    સરકાર  દ્વારા આ ઉત્સવને રાજ્ય કક્ષાનો દરજ્જો આપ્યા બાદ વહીવટીતંત્ર દ્વારા સુરક્ષા અને સુવિધાઓના ચુસ્ત બંદોબસ્ત કરવામાં આવ્યા છે:
લાખો ભક્તોની ભીડને ધ્યાનમાં રાખીને પીવાના પાણી, તબીબી સેવાઓ અને પરિવહન માટે ખાસ વ્યવસ્થા કરવામાં આવી છે.
 વહીવટીતંત્રે ભક્તોને ભક્તિભાવથી પ્રાર્થના કરવા અપીલ કરી છે, જેના કારણે સમગ્ર રાજ્યમાં અત્યારે મંગલમય અને ઉત્સવભર્યું વાતાવરણ જોવા મળી રહ્યું છે.
વૈશ્વિક આકર્ષણ: માત્ર તેલંગાણા કે ભારત જ નહીં, પરંતુ વિદેશથી પણ પ્રવાસીઓ આ અનોખી આદિવાસી પરંપરા અને સંસ્કૃતિના સાક્ષી બનવા માટે પહોંચી રહ્યા છે.
આ જાતરા આદિવાસી મહિલાઓ સમ્ક્કા અને સરલમ્માના બલિદાન અને અન્યાય સામેની તેમની લડતની યાદમાં યોજાય છે. તેલંગાણા સરકારના આ નિર્ણયથી આ વારસાને વધુ પ્રોત્સાહન મળશે અને પ્રવાસન ક્ષેત્રે પણ મેદારમની ઓળખ વધુ મજબૂત બનશે. આ શુભ પ્રસંગે સમગ્ર રાજ્યમાં દિવાળી જેવો માહોલ જોવા મળી રહ્યો છે.