સોનભદ્ર : ઉત્તર પ્રદેશના સોનભદ્ર જિલ્લામાં રામલીલાના મંચન દરમિયાન એક હૃદયદ્રાવક ઘટના બની છે. શાહગંજ પોલીસ સ્ટેશન વિસ્તારના ખૈરા ગામમાં રાવણ વધના દ્રશ્ય દરમિયાન ભગવાન રામ બનેલા કલાકાર દ્વારા છોડવામાં આવેલું તીર સીધું રાવણની ભૂમિકા ભજવતા યુવકની આંખમાં ઘૂસી ગયું હતું. આ ગંભીર બેદરકારીમાં કલાકારે પોતાની એક આંખની દ્રષ્ટિ કાયમ માટે ગુમાવી દીધી છે. જોકે, આ ઘટના હવે માત્ર અકસ્માત ન રહેતા પોલીસ કેસ અને જ્ઞાતિવાદના વિવાદમાં ફેરવાઈ ગઈ છે.

આ ઘટના ૧૩ નવેમ્બર, ૨૦૨૫ના રોજ બની હતી, જેમાં નૈતિક પાંડે (રામની ભૂમિકા) દ્વારા છોડવામાં આવેલું તીર સુનીલ કુમાર (રાવણની ભૂમિકા) ની આંખમાં વાગ્યું હતું. ઈજાગ્રસ્ત સુનીલને લોહીલુહાણ હાલતમાં વારાણસીની હોસ્પિટલમાં દાખલ કરવામાં આવ્યો છે, જ્યાં તેની સ્થિતિ નાજુક હોવાનું કહેવાય છે.
 પીડિત સુનીલ કુમારના ભાઈ શિવમલલે આ ઘટનાને અકસ્માત માનવાનો સ્પષ્ટ ઇનકાર કર્યો છે. પોલીસને આપેલી ફરિયાદમાં ચોંકાવનારા આરોપો લગાવવામાં આવ્યા છે:
 જ્યારે પીડિત પરિવારે આયોજક રામસનેહી સિંહ અને કલાકાર નૈતિક પાંડે પાસે ઈલાજના ખર્ચની માંગ કરી, ત્યારે તેમણે હાથ ઊંચા કરી દીધા હતા.
 આરોપ છે કે મદદ માંગવા ગયેલા પરિવારને આરોપીઓએ જાતિસૂચક ગાળો આપી હતી અને જાનથી મારી નાખવાની ધમકી આપી હતી.
શરૂઆતમાં ઢીલી નીતિ અપનાવ્યા બાદ, પરિવારના આક્રોશને જોતા પોલીસે હવે બંને આરોપીઓ વિરુદ્ધ SC/ST એક્ટ અને ભારતીય દંડ સંહિતાની ગંભીર કલમો હેઠળ ગુનો નોંધી તપાસ તેજ કરી છે.
 
આ ઘટનાએ રામલીલા જેવા લોકપ્રિય ધાર્મિક કાર્યક્રમોમાં સુરક્ષાના ધોરણો પર ગંભીર સવાલ ઉઠાવ્યા છે. અસલી અણીવાળા તીરનો ઉપયોગ કેમ કરવામાં આવ્યો અને કલાકારોની સુરક્ષા માટે કોઈ તકેદારી કેમ ન રખાઈ તે બાબતે પોલીસ આયોજકોની પૂછપરછ કરી રહી છે. હાલમાં આ મામલો સમગ્ર સોનભદ્ર જિલ્લામાં ટોક-ઓફ-ધ-ટાઉન બન્યો છે.