નવી દિલ્હી : દેશના કોર્પોરેટ જગત અને બેંકિંગ ક્ષેત્રમાં ભારે ચકચાર જગાવનારા એક મોટા સમાચાર સામે આવ્યા છે. એન્ફોર્સમેન્ટ ડિરેક્ટોરેટ એટલે કે ઈડીએ અનિલ અંબાણી જૂથની કંપની રિલાયન્સ કોમ્યુનિકેશન્સના ભૂતપૂર્વ ડાયરેક્ટર પુનિત ગર્ગની ધરપકડ કરી છે. આ ધરપકડ અંદાજે ૪૦,૦૦૦ કરોડ રૂપિયાથી વધુના કથિત બેંક લોન છેતરપિંડી અને મની લોન્ડરિંગના મામલામાં કરવામાં આવી છે. 
પ્રાપ્ત વિગતો અનુસાર, સ્ટેટ બેંક ઓફ ઈન્ડિયા સહિતની વિવિધ બેંકોના કન્સોર્ટિયમ સાથે થયેલી જંગી રકમની છેતરપિંડીના કેસમાં તપાસ એજન્સી લાંબા સમયથી સક્રિય હતી. પુનિત ગર્ગ પર આરોપ છે કે તેમણે કંપનીના અન્ય ઉચ્ચ અધિકારીઓ સાથે મળીને બેંકોમાંથી લોન પેટે મેળવેલી જંગી રકમને કથિત રીતે ડાયવર્ટ કરી હતી અને તેનો ઉપયોગ જે હેતુ માટે લોન લેવામાં આવી હતી તેના બદલે અન્યત્ર કર્યો હતો.
ઈડીના સૂત્રોના જણાવ્યા અનુસાર, પ્રિવેન્શન ઓફ મની લોન્ડરિંગ એક્ટ હેઠળ આ કાર્યવાહી કરવામાં આવી છે. પુનિત ગર્ગ તપાસમાં સહકાર આપી રહ્યા ન હતા અને એજન્સી સમક્ષ હાજર થવામાં પણ વિલંબ કરી રહ્યા હતા, જેના પગલે આ આકરું પગલું ભરવામાં આવ્યું છે. આ કેસની તપાસ સીબીઆઈ દ્વારા નોંધાયેલી એફઆઈઆરના આધારે શરૂ કરવામાં આવી હતી. આરોપ છે કે રિલાયન્સ કોમ્યુનિકેશન્સ અને તેની સહાયક કંપનીઓએ ક્રેડિટ સુવિધાઓનો દુરુપયોગ કર્યો હતો અને નાણાંની ઉથલપાથલ કરી હતી. 
તપાસ દરમિયાન એવું પણ સામે આવ્યું છે કે કંપનીના ખાતાઓમાંથી મોટી રકમ શંકાસ્પદ રીતે સંલગ્ન પાર્ટીઓમાં ટ્રાન્સફર કરવામાં આવી હતી, જે બેંકિંગ નિયમોનું સીધું ઉલ્લંઘન હતું.
આ ધરપકડ બાદ કોર્પોરેટ લોબીમાં સન્નાટો વ્યાપી ગયો છે. ૪૦,૦૦૦ કરોડ રૂપિયા જેવી માતબર રકમનો આ મામલો હોવાથી, આર્થિક ગુનાખોરી ડામવા માટે તપાસ એજન્સીઓ કેટલી ગંભીર છે તેનો આ પુરાવો છે. હવે ઈડી પુનિત ગર્ગના રિમાન્ડ મેળવીને નાણાંના પ્રવાહ વિશે, એટલે કે 'મની ટ્રેલ' વિશે ઊંડાણપૂર્વક પૂછપરછ કરશે. 
આ કૌભાંડમાં અન્ય કયા મોટા માથાઓની સંડોવણી છે અને વિદેશમાં કોઈ નાણાં મોકલવામાં આવ્યા છે કે કેમ, તે દિશામાં પણ તપાસનો ધમધમાટ શરૂ થઈ ગયો છે. આગામી દિવસોમાં આ કેસમાં વધુ નવા ખુલાસા થવાની શક્યતા નકારી શકાય તેમ નથી.