પટના: આવતીકાલે એટલે કે રવિવારે લોકસભામાં વર્ષ ૨૦૨૬-૨૭ નું કેન્દ્રીય બજેટ રજૂ થવા જઈ રહ્યું છે ત્યારે સમગ્ર દેશની નજર નાણામંત્રી નિર્મલા સીતારમણ પર ટકેલી છે. ખાસ કરીને બિહારના ઔદ્યોગિક જગતમાં આ વખતે ભારે ઉત્સાહ અને અપેક્ષાઓ જોવા મળી રહી છે. રાજ્યના અગ્રણી ઉદ્યોગ સંગઠનોએ કેન્દ્ર સરકાર પાસે બિહારમાં વેપાર-વાણિજ્યને પાટા પર લાવવા માટે વિશેષ પ્રોત્સાહનો અને નાણાકીય પેકેજની માંગ કરી છે.
₹50,000 કરોડની ખાસ આર્થિક મદદની દરખાસ્ત
બિહાર ઇન્ડસ્ટ્રીઝ એસોસિએશન (BIA) એ નાણા મંત્રાલયને સૂચન કર્યું છે કે બિહારમાં ઔદ્યોગિક માળખું મજબૂત કરવા માટે આગામી ૧૦ વર્ષ સુધી દર વર્ષે ₹૫૦,૦૦૦ કરોડની ખાસ આર્થિક સહાય આપવામાં આવે. BIAના સચિવ અનિલ કુમાર સિંહાના જણાવ્યા મુજબ, આ સહાય લાંબા ગાળાની વ્યાજમુક્ત લોન તરીકે પણ હોઈ શકે છે, જેનો ઉપયોગ એક્સપ્રેસ-વે, ડ્રાય પોર્ટ અને ઔદ્યોગિક ટાઉનશીપના વિકાસ માટે કરી શકાય.
ટેક્સમાં રાહત અને નવા ઉદ્યોગોને પ્રોત્સાહન
BIA ના પ્રમુખ રામ લાલ ખૈતાને ભારપૂર્વક જણાવ્યું છે કે બિહાર જેવા રાજ્યોમાં રોકાણકારોને આકર્ષવા માટે આવકવેરામાં વિશેષ છૂટછાટ આપવી અનિવાર્ય છે. એસોસિએશને અમૃતસર-દિલ્હી-કોલકાતા ઇન્ડસ્ટ્રિયલ કોરિડોર પર ૫ થી ૬ નવી ઔદ્યોગિક ટાઉનશીપ વિકસાવવાની પણ માંગ કરી છે. આ ઉપરાંત, હલ્દિયાથી અલ્હાબાદ સુધીના ગંગા નદીના જળમાર્ગ પ્રોજેક્ટને વહેલી તકે પૂર્ણ કરવા વિનંતી કરી છે જેથી માલ પરિવહન સસ્તું અને સરળ બને.
શિક્ષણ અને વિશેષ દરજ્જાની રાજકીય માંગ
બીજી તરફ, રાજકીય મોરચે રાષ્ટ્રીય જનતા દળ (RJD) એ ફરી એકવાર બિહારને 'વિશેષ શ્રેણીનો દરજ્જો' આપવાની જૂની માંગ દોહરાવી છે. RJD પ્રવક્તા ચિત્તરંજન ગગને પટના યુનિવર્સિટીને કેન્દ્રીય યુનિવર્સિટીનો દરજ્જો આપવા અને કોસી નદી પર બંધ બાંધવાના અધૂરા વચનો પૂરા કરવા કેન્દ્ર સરકારને ટકોર કરી છે.
સેમિકન્ડક્ટર હબ અને બંધ પડેલી સુગર મિલો
બિહાર ચેમ્બર ઓફ કોમર્સના પ્રમુખ પી.કે. અગ્રવાલે આશા વ્યક્ત કરી છે કે આ બજેટમાં બિહારમાં સેમિકન્ડક્ટર હબ અને નવા ઔદ્યોગિક પાર્ક સ્થાપવા માટે બજેટની ફાળવણી કરવામાં આવશે. સાથે જ રાજ્યની અર્થવ્યવસ્થાનો મુખ્ય આધાર ગણાતી બંધ ખાંડ મિલોને ફરી શરૂ કરવા માટે પણ વિશેષ ભંડોળની અપેક્ષા રખાઈ રહી છે.