તિરુવનંતપુરમ,: કેરળ કોંગ્રેસમાં છેલ્લા ઘણા સમયથી ચાલી રહેલી આંતરિક ખેંચતાણ અને અટકળોનો આખરે સુખદ અંત આવ્યો છે. શનિવારે વિરોધ પક્ષના નેતા વી.ડી. સતીસને અચાનક સાંસદ શશી થરૂરના નિવાસસ્થાને પહોંચીને સૌને ચોંકાવી દીધા હતા. આ મુલાકાતે માત્ર અફવાઓ પર જ બ્રેક નથી લગાવી, પરંતુ ૨૦૨૭ની વિધાનસભા ચૂંટણી માટે યુનાઇટેડ ડેમોક્રેટિક ફ્રન્ટ (UDF) ના નવા વિજયી સમીકરણો પણ જાહેર કર્યા છે.
થરૂરની નવી ભૂમિકા: મેનીફેસ્ટોથી લઈને મેદાન સુધી
આ બેઠકમાં આગામી વિધાનસભા ચૂંટણીની રણનીતિ પર વિસ્તૃત ચર્ચા કરવામાં આવી હતી. શશી થરૂર હવે પાર્ટીમાં માત્ર એક સાંસદ તરીકે જ નહીં, પણ એક 'સ્ટ્રેટેજિસ્ટ' તરીકે પણ જોવા મળશે. તેઓ કોંગ્રેસનો ચૂંટણી ઢંઢેરો અને વિઝન ડોક્યુમેન્ટ તૈયાર કરવામાં મુખ્ય ભૂમિકા ભજવશે. વધુમાં, થરૂર રાજ્યભરના યુવાનો અને વ્યાવસાયિકો સાથે સીધો સંવાદ સાધવા માટે એક વિશેષ ઝુંબેશનું નેતૃત્વ કરશે.
હાઈકમાન્ડની એન્ટ્રી અને કોંગ્રેસ વફાદારી 
આ સમગ્ર સમાધાન પાછળ કોંગ્રેસ હાઈકમાન્ડ અને ખાસ કરીને કે.સી. વેણુગોપાલ તેમજ એ.કે. એન્ટનીની મધ્યસ્થી હોવાનું મનાય છે. બેઠક બાદ માધ્યમો સાથે વાત કરતા થરૂરે સ્પષ્ટ શબ્દોમાં કહ્યું કે, "મારા જીવનમાં માત્ર એક જ પક્ષ છે - કોંગ્રેસ. મારો એકમાત્ર ઉદ્દેશ્ય કોંગ્રેસ અને UDF ની ભવ્ય જીત સુનિશ્ચિત કરવાનો છે." આ નિવેદન સાથે જ તેમની અને મુખ્યમંત્રી પિનરાઈ વિજયન વચ્ચેની કથિત નિકટતાની ચર્ચાઓ શમી ગઈ છે.
140 બેઠકો પર 'સ્ટાર પ્રચારક'નો જાદુ
વી.ડી. સતીસને થરૂરને પાર્ટીના 'સ્ટાર પ્રચારક' ગણાવતા કહ્યું કે, તેઓ કેરળના તમામ ૧૪૦ વિધાનસભા મતવિસ્તારોમાં સક્રિય રહેશે. પાર્ટીનું માનવું છે કે થરૂરનો બૌદ્ધિક પ્રભાવ અને યુવા વર્ગમાં તેમની લોકપ્રિયતા, પરંપરાગત વોટ બેંકની બહારના મતદારોને આકર્ષવામાં 'ગેમ ચેન્જર' સાબિત થશે.
આ બેઠક બાદ કેરળમાં સત્તાધારી ડાબેરી ગઠબંધન (LDF) સામે કોંગ્રેસે મજબૂત કિલ્લેબંધી કરી લીધી હોય તેમ જણાય છે. હવે જોવાનું એ રહેશે કે 'થરૂર ફેક્ટર' કેરળમાં કોંગ્રેસને ફરી સત્તા અપાવવામાં કેટલું સફળ રહે છે.