કોલકાતા: પશ્ચિમ બંગાળમાં આગામી વિધાનસભા ચૂંટણી પહેલા રાજકીય સમીકરણો ઝડપથી બદલાઈ રહ્યા છે. 'જનતા ઉન્નયન પાર્ટી' (JUP) ના પ્રમુખ હુમાયું કબીરે શુક્રવારે સાંજે મુર્શિદાબાદમાં AIMIM ના પ્રદેશ અધ્યક્ષ ઈમરાન સોલંકી સાથે મુલાકાત કરી હતી. આ બેઠકે બંગાળના રાજકારણમાં તૃણમૂલ કોંગ્રેસ (TMC) અને મમતા બેનર્જી માટે ચિંતાના સંકેતો આપ્યા છે.
૧૧ ફેબ્રુઆરીથી મસ્જિદ નિર્માણ કાર્યની શરૂઆત
હુમાયું કબીરે જાહેરાત કરી છે કે તેઓ આગામી ૧૧ ફેબ્રુઆરીથી બાબરી મસ્જિદના પ્રતીકાત્મક નિર્માણ કાર્યની શરૂઆત કરશે. તેમણે જણાવ્યું કે આ પ્રસંગે લગભગ પાંચ હજાર લોકો એકઠા થશે અને પવિત્ર કુરાનના પાઠ સાથે પાયો નાખવામાં આવશે. આ કાર્યક્રમમાં રાજકારણથી દૂર રહીને મુસ્લિમ બૌદ્ધિકો અને શિક્ષણવિદોને પણ આમંત્રિત કરવામાં આવ્યા છે.
ઓવૈસી સાથે ગઠબંધનની રણનીતિ
કબીર માત્ર ધાર્મિક મુદ્દાઓ જ નહીં, પણ રાજકીય રીતે પણ મમતા સરકારને ઘેરવાની તૈયારીમાં છે. તેમણે સંકેત આપ્યો છે કે તેઓ બંગાળમાં AIMIM અને SDPI સાથે ગઠબંધન કરી શકે છે. માર્ચ મહિનામાં કોલકાતાના બ્રિગેડ પરેડ ગ્રાઉન્ડમાં એક વિશાળ રેલીનું આયોજન કરવામાં આવશે, જેમાં અસદુદ્દીન ઓવૈસી પોતે હાજર રહે તેવી શક્યતા છે. કબીરે દાવો કર્યો છે કે, "આ રેલી બંગાળમાં મમતા સરકારના પતનનો પાયો નાખશે."
TMC ની આકરી પ્રતિક્રિયા
બીજી તરફ, તૃણમૂલ કોંગ્રેસના નેતા અભિષેક બેનર્જીએ આ હિલચાલ પર કટાક્ષ કરતા કહ્યું છે કે હુમાયું કબીર માત્ર સાંપ્રદાયિક રાજનીતિ કરી રહ્યા છે. તેમણે કહ્યું કે ત્યાં માત્ર ઈંટો રાખવામાં આવી છે, કોઈ વાસ્તવિક નિર્માણ નથી. જોકે, AIMIM એ સ્પષ્ટ કર્યું છે કે તેઓ બંગાળમાં મુસ્લિમ, દલિત અને વંચિતોના હક માટે પૂરી તાકાતથી ચૂંટણી લડશે.