રોહતાસ (બિહાર):બિહારના રોહતાસ જિલ્લામાં રવિવારની વહેલી સવારે એક એવી ઘટના પ્રકાશમાં આવી છે જેણે કાયદો અને વ્યવસ્થાની સ્થિતિ પર ફરી એકવાર સવાલો ઉભા કર્યા છે. દેહરી પોલીસ સ્ટેશન વિસ્તારમાં આવેલા સ્ટેશન રોડ પરની શાકભાજી માર્કેટની પાછળ, કોઈ અજાણ્યા શખ્સો એક કિંમતી લાલ રંગની ટ્રોલી બેગ ફેંકીને ફરાર થઈ ગયા હતા. સવારે જ્યારે લોકોની નજર આ બિનવારસી બેગ પર પડી, ત્યારે કોઈને અંદાજ નહોતો કે તેમાં કોઈના જીવનનો કરુણ અંત છુપાયેલો છે. ડાયલ-112 પર મળેલી બાતમીના આધારે જ્યારે પોલીસે ઘટનાસ્થળે પહોંચીને આ બેગ ખોલી, ત્યારે અંદર એક યુવતીનો મૃતદેહ જોઈને આસપાસના લોકોમાં ચીસાચીસ મચી ગઈ હતી.

રોહતાસ જિલ્લા સાયબર ડીએસપી ગૌરવ કુમાર યાદવના જણાવ્યા અનુસાર, આ હત્યા અત્યંત આયોજનબદ્ધ રીતે કરવામાં આવી હોય તેમ જણાય છે. યુવતીની હત્યા અન્ય કોઈ સ્થળે કરીને પુરાવાનો નાશ કરવાના હેતુથી મૃતદેહને ટ્રોલી બેગમાં પેક કરી અહીં ફેંકી દેવામાં આવ્યો હતો. ઘટનાની ગંભીરતાને જોતા તાત્કાલિક FSL (ફોરેન્સિક સાયન્સ લેબોરેટરી) ની ટીમને બોલાવવામાં આવી છે, જેણે બેગ પરના ફિંગરપ્રિન્ટ્સ અને અન્ય કડીઓ મેળવવાની કવાયત શરૂ કરી છે. મૃતદેહ અત્યારે સાસારામની સદર હોસ્પિટલમાં પોસ્ટમોર્ટમ માટે મોકલી દેવાયો છે, જેથી હત્યાનો સમય અને પદ્ધતિ જાણી શકાય.

પોલીસ માટે અત્યારે સૌથી મોટો પડકાર યુવતીની ઓળખ કરવાનો છે. હજુ સુધી કોઈ પણ પરિવારે ગુમ થયાની ફરિયાદ નોંધાવી ન હોવાથી પોલીસ આસપાસના વિસ્તારો અને સીસીટીવી ફૂટેજ તપાસી રહી છે. શાકભાજી માર્કેટ જેવા ભરચક વિસ્તારની પાછળ બેગ ફેંકવાની હિંમત દર્શાવે છે કે હત્યારાઓ આ વિસ્તારથી પરિચિત હોવા જોઈએ. શું આ કોઈ 'ઓનર કિલિંગ' નો મામલો છે કે પછી પ્રેમમાં દગો મળતા કરવામાં આવેલી ઘાતકી હત્યા? તે તો પોલીસ તપાસ બાદ જ ખબર પડશે, પરંતુ આ ઘટનાએ રોહતાસમાં ભારે ફફડાટ ફેલાવી દીધો છે.