કોલકાતા: કોલકાતાનો સૌથી ધમધમતો વિસ્તાર પાર્ક સ્ટ્રીટ શુક્રવારે રાત્રે એક ગંભીર વિવાદનું કેન્દ્ર બન્યો છે. લોકપ્રિય બંગાળી અભિનેતા સૈયક ચક્રવર્તી જ્યારે તેના મિત્રો સાથે 'ઓલી' નામની પબમાં ડિનર કરવા ગયા હતા, ત્યારે ઓર્ડર આપવામાં આવેલી મટન સ્ટીકને બદલે કથિત રીતે 'બીફ' પીરસવામાં આવતા હંગામો મચી ગયો હતો. સૈયકનો દાવો છે કે એક હિન્દુ બ્રાહ્મણ તરીકે તે પોતાના ધર્મનું પાલન કરે છે અને ભૂલથી બીફ ખાઈ લેતા તેની ધાર્મિક આસ્થાને ઊંડી ઠેસ પહોંચી છે. આ મામલે પોલીસે ત્વરિત કાર્યવાહી કરીને વેઈટર શેખ નસીરુદ્દીનની ધરપકડ કરી છે.

ઘટનાની વિગતો મુજબ, સૈયકે મટન સ્ટીકનો ઓર્ડર આપ્યો હતો, પરંતુ ટેબલ પર બીજી એક પ્લેટ પણ મૂકવામાં આવી હતી. પૂછપરછ દરમિયાન વેઈટરે દાવો કર્યો હતો કે સૈયકે પોતે જ મટન અને બીફ બંનેનો ઓર્ડર આપ્યો છે. આ સાંભળીને અભિનેતા ચોંકી ઉઠ્યા હતા અને હોબાળો મચાવ્યો હતો. તેમણે પબના મેનેજર અને વેઈટરને સવાલ કરતા વીડિયો સોશિયલ મીડિયા પર શેર કર્યો હતો, જેમાં મેનેજર પોતાની ભૂલ સ્વીકારીને માફી માંગતો દેખાય છે. પાર્ક સ્ટ્રીટ પોલીસે ભારતીય ન્યાય સંહિતાની કલમ ૨૯૯ (ધાર્મિક લાગણી દુભાવવી) હેઠળ ગુનો નોંધી વધુ તપાસ હાથ ધરી છે.

આ ઘટનાનો વીડિયો વાયરલ થતા જ સોશિયલ મીડિયા પર બે ભાગલા પડી ગયા છે. કેટલાક યુઝર્સે આને જાણી જોઈને કરવામાં આવેલી બેદરકારી ગણાવી છે, તો કેટલાકે સૈયક પર કોમી તણાવ પેદા કરવાનો અને રાજકીય એજન્ડા ચલાવવાનો આરોપ લગાવ્યો છે. વિવાદ વધતો જોઈને સૈયકે સ્પષ્ટતા કરી છે કે, "હું ઈદ પણ ઉજવું છું અને મારા ઘણા મુસ્લિમ મિત્રો છે, મારો વિરોધ માત્ર રેસ્ટોરન્ટની બેદરકારી સામે હતો." હાલમાં કોલકાતા પોલીસ ખોરાકના નમૂનાઓ લેબોરેટરીમાં મોકલવાની તૈયારી કરી રહી છે જેથી પીરસવામાં આવેલી વાનગી ખરેખર બીફ હતી કે નહીં તેની પુષ્ટિ થઈ શકે.