નવી દિલ્હી, તા. 02: ભારતીય રેલવેના ઈતિહાસમાં એક નવો અધ્યાય જોડાવા જઈ રહ્યો છે. નાણામંત્રી નિર્મલા સીતારમણે બજેટ 2026માં દેશના વિવિધ ભાગોને જોડતા 7 નવા હાઈ-સ્પીડ રેલ (બુલેટ ટ્રેન) કોરિડોરની મહત્વકાંક્ષી જાહેરાત કરી છે. આ પ્રોજેક્ટનો હેતુ મોટા શહેરો વચ્ચેના મુસાફરીના સમયને અડધાથી પણ ઓછો કરવાનો છે, જેનાથી વેપાર અને પર્યટનને મોટો વેગ મળશે.
આ જાહેરાતમાં સૌથી વધુ ચર્ચા મુંબઈ-પુણે રૂટની થઈ રહી છે. હવે મુંબઈથી પુણેનું અંતર કાપવામાં કલાકો નહીં, પણ માત્ર 48 મિનિટ લાગશે. તેવી જ રીતે, દક્ષિણ ભારતમાં પણ કનેક્ટિવિટી મજબૂત કરવામાં આવશે; ચેન્નાઈથી બેંગલુરુ માત્ર 1 કલાક અને 13 મિનિટમાં પહોંચી શકાશે, જ્યારે બેંગલુરુથી હૈદરાબાદની મુસાફરી માત્ર 2 કલાકમાં પૂર્ણ થશે.
નવા જાહેર થયેલા મુખ્ય કોરિડોર અને સમય:
રૂટ (કોરિડોર)    અંદાજિત સમય
મુંબઈ થી પુણે    48 મિનિટ
ચેન્નાઈ થી બેંગલુરુ    1 કલાક 13 મિનિટ
બેંગલુરુ થી હૈદરાબાદ    2 કલાક
પુણે થી હૈદરાબાદ    1 કલાક 55 મિનિટ
દિલ્હી થી વારાણસી    3 કલાક 50 મિનિટ
વારાણસી થી સિલિગુડી    2 કલાક 55 મિનિટ
ઉત્તર ભારત માટે પણ સારા સમાચાર છે, જ્યાં દિલ્હી અને વારાણસી વચ્ચેનું અંતર 4 કલાકથી પણ ઓછા સમયમાં કાપી શકાશે. આ હાઈ-સ્પીડ ટ્રેનો માત્ર સમય જ નહીં બચાવે, પણ આધુનિક ટેકનોલોજી અને સુવિધાઓ સાથે મુસાફરોને આંતરરાષ્ટ્રીય કક્ષાનો અનુભવ પણ પૂરો પાડશે. સરકારનો આ નિર્ણય ભારતના ઈન્ફ્રાસ્ટ્રક્ચરને આગામી દાયકા માટે તૈયાર કરવાની દિશામાં એક મજબૂત કદમ માનવામાં આવી રહ્યો છે.