મુંબઈ: દેશની સૌથી ધનિક મ્યુનિસિપલ કોર્પોરેશન, એટલે કે મુંબઈ મહાનગરપાલિકા (BMC) ના ચૂંટણી જંગમાં ભવ્ય વિજય મેળવ્યા બાદ હવે ભારતીય જનતા પાર્ટીએ સત્તાના સમીકરણો ગોઠવવાની શરૂઆત કરી દીધી છે. ભાજપે અનુભવી નેતા ગણેશ ખાનકરને BMCમાં પોતાના 'જૂથ નેતા' (Group Leader) તરીકે નિયુક્ત કર્યા છે. આ નિમણૂક સાથે જ મુંબઈના વહીવટમાં ભાજપનું વર્ચસ્વ વધુ મજબૂત બન્યું છે.

ગણેશ ખાનકરે દહિસરના વોર્ડ નંબર 7 માંથી શિવસેના (UBT) ના દિગ્ગજ નેતા વિનોદ ઘોસાલકરના પુત્ર સૌરભ ઘોસાલકરને પરાજય આપીને સૌનું ધ્યાન ખેંચ્યું હતું. હવે તેઓ ગૃહના નેતા તરીકે સેવા આપશે. નોંધનીય છે કે, તાજેતરમાં સંપન્ન થયેલી ચૂંટણીમાં ભાજપ એકલા હાથે 89 બેઠકો જીતીને સૌથી મોટા પક્ષ તરીકે ઉભરી આવ્યો છે, જ્યારે શિંદે સેના સાથે મળીને મહાયુતિ ગઠબંધન પાસે કુલ 118 બેઠકોનું સંખ્યાબળ છે.

મેયરની ચૂંટણીમાં કેમ થઈ રહ્યો છે વિલંબ?

જોકે બહુમતી હોવા છતાં, મુંબઈના નવા મેયરની ચૂંટણી ફેબ્રુઆરીના બીજા અઠવાડિયા સુધી મુલતવી રાખવામાં આવી છે. ભાજપ અને શિંદે જૂથ વચ્ચે સત્તાની વહેંચણી અને ઔપચારિક નોંધણી પ્રક્રિયામાં થઈ રહેલો વિલંબ રાજકીય ગલિયારાઓમાં ચર્ચાનો વિષય બન્યો છે. સોમવારે ભાજપ તેના તમામ 89 કોર્પોરેટરો સાથે કોંકણ ભવન ખાતે જૂથની ઔપચારિક નોંધણી કરાવશે તેવું મનાય છે.

હવે જોવાનું એ રહેશે કે ગણેશ ખાનકરના નેતૃત્વમાં ભાજપ મુંબઈના વિકાસ અને આગામી મેયરની વરણીમાં કેવો વળાંક લાવે છે. શિંદે-ભાજપ ગઠબંધન મુંબઈના ભવિષ્ય માટે કયા નવા પ્રોજેક્ટ્સ લાવશે તેના પર મુંબઈગરાઓની નજર ટકેલી છે.