નવી દિલ્હી: રાષ્ટ્રીય રાજધાનીના ઇન્દિરા ગાંધી આંતરરાષ્ટ્રીય એરપોર્ટ (IGI) પર મુસાફરી કરનારા પ્રવાસીઓ માટે સારા સમાચાર છે. ટર્મિનલ-3 (T3) પર આંતરરાષ્ટ્રીય મુસાફરોની સતત વધતી સંખ્યા અને ભીડને ધ્યાનમાં રાખીને એરપોર્ટ ઓપરેટર DIAL એ એક મોટો નિર્ણય લીધો છે. અત્યાર સુધી જે પિયર-C (Pier C) નો ઉપયોગ સ્થાનિક (ડોમેસ્ટિક) ફ્લાઈટ્સ માટે થતો હતો, તેને હવે આંતરરાષ્ટ્રીય કામગીરી માટે તૈયાર કરવામાં આવી રહ્યો છે.

આ પરિવર્તનથી એરપોર્ટની આંતરરાષ્ટ્રીય મુસાફરોને હેન્ડલ કરવાની ક્ષમતા વાર્ષિક 20 મિલિયનથી વધીને 30 મિલિયન થઈ જશે. એટલે કે, ક્ષમતામાં સીધો 50 ટકાનો જંગી વધારો થશે.
 હાલમાં ટર્મિનલ-3 પર પિયર A, B, C અને D કાર્યરત છે. અત્યાર સુધી માત્ર બે પિયર આંતરરાષ્ટ્રીય મુસાફરો માટે હતા, પરંતુ હવે પિયર-C ના જોડાણથી કુલ ત્રણ પિયર આંતરરાષ્ટ્રીય સેવાઓ આપશે. આ રૂપાંતરણનું કામ પૂરજોશમાં ચાલી રહ્યું છે અને માર્ચ 2026 સુધીમાં તે સંપૂર્ણપણે પૂર્ણ થવાની અપેક્ષા છે. આ ફેરફાર બાદ વિદેશ જતા પ્રવાસીઓને ઈમિગ્રેશન અને સુરક્ષા તપાસમાં ઓછો સમય રાહ જોવી પડશે.
દિલ્હી બનશે વૈશ્વિક એવિએશન હબ: DIAL દ્વારા હાથ ધરવામાં આવેલી આ પહેલ દિલ્હી એરપોર્ટને વિશ્વના શ્રેષ્ઠ એવિએશન હબની હરોળમાં લાવશે. ક્ષમતા વધવાથી વધુ આંતરરાષ્ટ્રીય એરલાઇન્સ દિલ્હીથી પોતાની ફ્લાઇટ્સ શરૂ કરી શકશે.
 વાર્ષિક 1 કરોડ વધારાના આંતરરાષ્ટ્રીય મુસાફરોની અવરજવર શક્ય બનશે.
મુસાફરો માટે ચેક-ઈન અને બોર્ડિંગ પ્રક્રિયા વધુ ઝડપી બનશે.
પિયર-C માં નવા ઈન્ટરનેશનલ લાઉન્જ અને ડ્યુટી-ફ્રી શોપ્સની પણ સુવિધા વધારવામાં આવશે.