મુંબઈ: ભારત અને અમેરિકા વચ્ચે થયેલો ઐતિહાસિક વેપાર સોદો માત્ર આર્થિક કરાર નથી, પરંતુ ભારત માટે વ્યૂહાત્મક જીત છે. 2 ફેબ્રુઆરી, 2026ના રોજ પીએમ મોદી અને રાષ્ટ્રપતિ ટ્રમ્પ વચ્ચે થયેલી આ સમજૂતીએ વૈશ્વિક સપ્લાય ચેઈનના સમીકરણો બદલી નાખ્યા છે. આ સોદાને કારણે હવે અમેરિકામાં ભારતીય ઉત્પાદનો પરનો ટેરિફ ઘટીને 18% થઈ ગયો છે, જે હરીફ દેશોની સરખામણીએ ભારતને 'બિગ બ્રધર'ની ભૂમિકામાં લાવે છે.

હરીફ દેશો સામે ભારતની સરસાઈ:

નવા ટેરિફ દરો મુજબ, ભારતીય માલ હવે એશિયાના અન્ય દેશો કરતા અમેરિકન ખરીદદારો માટે વધુ સસ્તો અને આકર્ષક બન્યો છે:

• ચીન: 37% ટેરિફ (ભારત કરતા બમણાથી પણ વધુ)
• બાંગ્લાદેશ અને વિયેતનામ: 20% ટેરિફ
• પાકિસ્તાન: 19% ટેરિફ
• ભારત: માત્ર 18% ટેરિફ

આ તફાવતને કારણે ટેક્સટાઇલ, ફાર્માસ્યુટિકલ્સ અને એન્જિનિયરિંગ ક્ષેત્રના ભારતીય નિકાસકારો માટે અમેરિકામાં કમાણીની નવી તકો ઊભી થઈ છે. ચીન સામે અમેરિકાના કડક વલણનો સીધો ફાયદો હવે ભારતને મળશે.

દંડથી મિત્રતા સુધીની સફર:

ઓગસ્ટ 2025માં ભારત પર રશિયા પાસેથી તેલ ખરીદવા બદલ 50% જેટલો જંગી ટેરિફ લાદવામાં આવ્યો હતો. જોકે, ભારતે કુનેહપૂર્વક રશિયન તેલ પરની નિર્ભરતા ઘટાડીને "અમેરિકન ખરીદો" (Buy American) ની નીતિ અપનાવતા ટ્રમ્પ સરકારે તમામ દંડ હટાવી લીધા છે. ટ્રમ્પે સોશિયલ મીડિયા પર લખ્યું કે, "પીએમ મોદી અને હું એવા બે લોકો છીએ જે કામ પૂરું કરવામાં માને છે."

નવી પ્રતિબદ્ધતાઓ અને ભવિષ્ય:

આ કરાર મુજબ, ભારત હવે તેની ઊર્જા જરૂરિયાતો માટે અમેરિકા અને વેનેઝુએલા તરફ વળશે. બીજી તરફ, અમેરિકન ટેક કંપનીઓ અને ખેડૂતો માટે ભારતીય બજારના દરવાજા પણ ખુલી જશે. નિષ્ણાતોના મતે, આ સોદો ભારતીય બ્રાન્ડ્સને વૈશ્વિક મંચ પર સ્થાપિત કરવા માટેની 'નિર્ણાયક ક્ષણ' છે.