નવી દિલ્હી | તા.3: ભારત અને અમેરિકા વચ્ચે થયેલા ઐતિહાસિક વેપાર કરારને લઈને જ્યાં એકતરફ સરકારમાં ઉત્સાહ છે, ત્યાં બીજી તરફ વિપક્ષે આ સોદાની પારદર્શિતા સામે સવાલો ઉઠાવ્યા છે. કોંગ્રેસના વરિષ્ઠ નેતા અને સાંસદ શશી થરૂરે કેન્દ્ર સરકાર પાસે આ ડીલની 'ફૂલ ડિટેલ્સ' માંગી છે. તેમણે સ્પષ્ટ કર્યું છે કે વિપક્ષ વિરોધ માટે વિરોધ નથી કરી રહ્યો, પરંતુ દેશના હિતમાં સ્પષ્ટતા ઈચ્છે છે.

ટ્વીટ પર સરકાર ચલાવવાનો આરોપ:

શશી થરૂરે કટાક્ષ કરતા પૂછ્યું કે, "શું સંસદીય લોકશાહીમાં માત્ર યુએસ રાષ્ટ્રપતિ ડોનાલ્ડ ટ્રમ્પ અને પીએમ મોદીના સોશિયલ મીડિયા પોસ્ટથી જ દેશ ચાલશે?" તેમણે દલીલ કરી કે ટેરિફ ઘટાડીને 18 ટકા કરવો એ સારી વાત હોઈ શકે, પણ સરકારે સંસદમાં આવીને સત્તાવાર રીતે જણાવવું જોઈએ કે તેના બદલામાં ભારતે શું ગુમાવ્યું છે અને શું મેળવ્યું છે.

ખેડૂતો અને બજાર પર અસરની ચિંતા:

થરૂરે વેપાર સોદાના આંકડાઓ પર ગંભીર સવાલ ઉઠાવતા કહ્યું કે:

• કૃષિ ક્ષેત્ર: શું ભારતીય બજાર અમેરિકન ખેડૂતો માટે ખોલી દેવામાં આવ્યું છે? જો એમ હોય તો આપણા ખેડૂતોના રક્ષણ માટે શું જોગવાઈ છે?
• આયાત બિલ: ટ્રમ્પ 500 બિલિયન ડોલરના વેપારની વાત કરે છે, જ્યારે ભારતનું કુલ આયાત બિલ જ 700 બિલિયન ડોલર છે. શું આપણે અન્ય દેશો પાસેથી આયાત ઘટાડીને માત્ર અમેરિકા પર નિર્ભર રહેવું પડશે?
• રશિયન ઓઈલ: શું ભારતે સસ્તું રશિયન તેલ ખરીદવાનું બંધ કરવાની શરત સ્વીકારી લીધી છે?

કોંગ્રેસનો આકરો પ્રહાર:

કોંગ્રેસ પાર્ટીએ આ ડીલને લઈને ભાજપ પર પ્રહાર કરતા કહ્યું છે કે, પીએમ મોદીએ ટ્રમ્પ સામે હાર સ્વીકારી લીધી છે. જયરામ રમેશે કટાક્ષ કર્યો કે "મોગેમ્બો વોશિંગ્ટનમાં ખુશ છે," પણ તેનાથી ભારતીય ઉદ્યોગો અને નાના વેપારીઓ મુશ્કેલીમાં મુકાઈ શકે છે. વિપક્ષની માંગ છે કે 'ઝીરો ટેરિફ' અને 'નોન-ટેરિફ બેરિયર્સ' હટાવવાની શરતોથી ભારતના સ્થાનિક ઉત્પાદકોને કેવી રીતે બચાવવામાં આવશે તે સરકાર સ્પષ્ટ કરે.

શશી થરૂરે અંતમાં કહ્યું, "જો આ ખરેખર સારા સમાચાર હોય તો અમે પણ તેની ઉજવણી કરવા માંગીએ છીએ, પણ તે પહેલા અમને સંપૂર્ણ માહિતી આપો."