કોલકાતા:  બાંગ્લાદેશમાં આગામી ૧૨ ફેબ્રુઆરીએ યોજાનારી સામાન્ય ચૂંટણી પૂર્વે પાડોશી દેશમાં લોકશાહીનો માહોલ છે, પરંતુ તેની પટકથા ભારતની ધરતી પર લખાઈ રહી હોય તેમ જણાય છે. સત્તા પરથી હાંકી કાઢવામાં આવ્યાના ૧૭ મહિના બાદ પણ શેખ હસીના અને તેમની પાર્ટી 'આવામી લીગ' હાર સ્વીકારવા તૈયાર નથી. સૂત્રોના જણાવ્યા અનુસાર, શેખ હસીના દિલ્હીના એક સુરક્ષિત અને ગુપ્ત લોકેશન પરથી પાર્ટીનું સંચાલન કરી રહ્યા છે. કોલકાતામાં આશરો લઈ રહેલા સેંકડો પૂર્વ નેતાઓને વારંવાર દિલ્હી બોલાવીને ચૂંટણીના દિવસે બાંગ્લાદેશમાં અરાજકતા ફેલાવવા અને વર્તમાન વચગાળાની સરકાર પર દબાણ લાવવાની ગુપ્ત રણનીતિ તૈયાર કરવામાં આવી રહી છે.

મે ૨૦૨૪માં બાંગ્લાદેશની વચગાળાની સરકારે આવામી લીગ પર સંપૂર્ણ પ્રતિબંધ લાદ્યો હોવા છતાં, પક્ષે ચૂંટણી પ્રક્રિયાને ગેરકાયદેસર ગણાવીને તેને નબળી પાડવાનો નિર્ણય લીધો છે. શેખ હસીના સામે હત્યા અને માનવતા વિરુદ્ધના ગુનાઓ માટે મૃત્યુદંડની સજા સંભળાવવામાં આવી છે, પરંતુ તેમના સમર્થકો માને છે કે આ બધું રાજકીય કાવતરું છે. કોલકાતામાં પડાવ નાખીને બેઠેલા અંદાજે ૬૦૦ જેટલા નેતાઓ અને હજારો કાર્યકરો સોશિયલ મીડિયા અને અન્ય ગુપ્ત માધ્યમો દ્વારા બાંગ્લાદેશમાં રહેલા પોતાના કેડર સાથે સંપર્કમાં છે. તેમનો મુખ્ય ઉદ્દેશ્ય ચૂંટણીના દિવસે મોટા પાયે વિરોધ પ્રદર્શનો યોજીને વિશ્વને એ બતાવવાનો છે કે આવામી લીગ વગરની ચૂંટણી અશક્ય છે.

બાંગ્લાદેશમાં જુલાઈ ૨૦૨૪ના એ લોહિયાળ બળવા બાદ, જેમાં અંદાજે ૧,૪૦૦ લોકોએ જીવ ગુમાવ્યા હતા, આવામી લીગની છબી ખરડાઈ છે, પરંતુ પક્ષ હજુ પણ પુનરાગમનની આશા સેવી રહ્યો છે. જો ૧૨ ફેબ્રુઆરીની ચૂંટણીમાં મતદાન ઓછું થાય અથવા પરિણામોમાં અસ્થિરતા સર્જાય, તો હસીના આ તકનો ઉપયોગ કરી પોતાની કાયદેસરતા સાબિત કરવા માંગે છે. પક્ષના અગ્રણી નેતાઓ દાવો કરી રહ્યા છે કે હસીના ટૂંક સમયમાં એક 'હીરો' તરીકે ઢાકામાં પરત ફરશે. હવે જોવાનું એ રહેશે કે ભારતની ધરતી પરથી ઘડાતી આ વ્યૂહરચના બાંગ્લાદેશના ચૂંટણી મેદાનમાં કેટલી સફળ રહે છે અને ભારત સરકાર આ મામલે કેવું વલણ અપનાવે છે.