મુંબઈ : માયાનગરી મુંબઈના અંધેરી (વેસ્ટ) વિસ્તારમાં એક મોડેલની હત્યાના પ્રયાસની ચોંકાવનારી ઘટના સામે આવી છે. લોખંડવાલામાં એક 29 વર્ષીય યુવકે અંગત અદાવતમાં એક મહિલા પર પોતાની લક્ઝરી કાર ચડાવી તેને કચડી નાખવાનો પ્રયાસ કર્યો હતો. આ સમગ્ર ઘટના બિલ્ડિંગના સીસીટીવી (CCTV) કેમેરામાં કેદ થઈ ગઈ છે, જે જોઈને કોઈના પણ રુવાડા ઉભા થઈ જાય તેમ છે.
સીસીટીવીમાં શું દેખાયું?
લોખંડવાલાની એરેના બિલ્ડિંગ પાસે રાત્રે 9:30 વાગ્યાની આસપાસ આરોપી મોહમ્મદ શેખ પોતાની કાર લઈને આવ્યો હતો. વાયરલ ફૂટેજમાં જોઈ શકાય છે કે જેવી મહિલા પ્રવેશદ્વાર પાસે દેખાય છે, આરોપીએ અચાનક કારની ઝડપ વધારી તેને ટક્કર મારવાનો પ્રયાસ કર્યો હતો. મહિલા બચીને ભાગી તો આરોપીએ બીજી વખત રિવર્સ લઈને ફરીથી તેના પર ગાડી ચડાવવાની કોશિશ કરી. સદનસીબે, ત્યાં હાજર રહેવાસીઓએ સતર્કતા દાખવી બિલ્ડિંગનો લોખંડી દરવાજો બંધ કરી દીધો, જેના કારણે મોટી હોનારત ટળી ગઈ.
ધમકી બાદ હુમલો
પોલીસ તપાસમાં બહાર આવ્યું છે કે આરોપી છેલ્લા 9 મહિનાથી આ મોડેલ અને તેના પરિવાર વિશે સોશિયલ મીડિયા પર અફવાઓ ફેલાવી રહ્યો હતો. જ્યારે મોડેલ અને તેની મિત્રએ આ બાબતે તેનો સામનો કરવાનો પ્રયાસ કર્યો, ત્યારે વિવાદ વકર્યો હતો. હુમલાના એક દિવસ પહેલા જ પીડિતાની મિત્રને સ્નેપચેટ (Snapchat) પર એસિડ એટેકની ધમકી આપવામાં આવી હતી. આ ધમકીના ગણતરીના કલાકોમાં જ આરોપીએ કારથી હુમલો કર્યો હતો.
પોલીસ કાર્યવાહી
ઓશિવારા પોલીસે પીડિતાની ફરિયાદના આધારે મોહમ્મદ શેખ વિરુદ્ધ હત્યાના પ્રયાસ અને અન્ય ગંભીર કલમો હેઠળ ગુનો નોંધી વધુ તપાસ હાથ ધરી છે. મુંબઈ જેવા સુરક્ષિત ગણાતા શહેરમાં જાહેરમાં આ રીતે મહિલા પર હુમલો થતા સુરક્ષા વ્યવસ્થા પર પણ સવાલો ઉભા થયા છે.