નવી દિલ્હી : અમેરિકાના રાષ્ટ્રપતિ ડોનાલ્ડ ટ્રમ્પના દાવાઓ બાદ ભારતમાં રાજકીય ગરમાવો વધી ગયો છે. સમાજવાદી પાર્ટીના વડા અખિલેશ યાદવે ભારત-યુએસ વેપાર કરાર મુદ્દે કેન્દ્રની ભાજપ સરકાર પર આકરા પ્રહાર કર્યા છે. અખિલેશે આ કરારને 'ડીલ' (Deal) ને બદલે 'ઢીલ' (છૂટછાટ) ગણાવીને આરોપ લગાવ્યો છે કે સરકારે આપણું આખું બજાર અમેરિકાને સોંપી દીધું છે.
"સનાતનીઓના ઉપવાસનું શું?"
અખિલેશ યાદવે એક સંવેદનશીલ મુદ્દો ઉઠાવતા કહ્યું કે, જો અમેરિકાના ડેરી અને કૃષિ ઉત્પાદનો ભારતમાં આયાત કરવામાં આવશે, તો 'સનાતની' પરંપરા પાળતા લોકો માટે મુશ્કેલી ઊભી થશે. તેમણે પ્રશ્ન કર્યો કે, "જો ડેરી ઉત્પાદનો ત્યાંથી આવશે, તો સનાતનીઓ અને ભારતીયો તેમના ઉપવાસ વિધિઓ કેવી રીતે પૂર્ણ કરશે? શું તેમનો ઉપવાસ 'સનાતની' રહેશે ખરો?" તેમણે 'સ્વદેશી'ના નારા લગાવનારા ભાજપના સાથી પક્ષોના મૌન સામે પણ સવાલ ઉઠાવ્યા હતા.
ચીન મુદ્દે પણ સરકારને ઘેરી
વેપાર કરાર સિવાય અખિલેશ યાદવે ચીન સાથેના સરહદ વિવાદ પર પણ સરકારની ટીકા કરી. તેમણે લોકસભાના સાંસદ રાહુલ ગાંધીના સ્ટેન્ડને ટેકો આપતા કહ્યું કે, ભાજપ હંમેશા સંસદમાં મહત્વની ચર્ચાઓ ટાળવાનો પ્રયાસ કરે છે. તેમણે ઉમેર્યું કે, "આપણે ચીન સામે માત્ર જમીન જ નથી ગુમાવી રહ્યા, પરંતુ આપણું બજાર પણ ગુમાવી રહ્યા છીએ. રાષ્ટ્રીય સુરક્ષા અને સશસ્ત્ર દળોના અભિપ્રાય વિશે દેશે જાણવું જોઈએ."
સરકારનો બચાવ
બીજી તરફ, વાણિજ્ય મંત્રી પીયૂષ ગોયલે આ આક્ષેપોને નકારી કાઢતા જણાવ્યું છે કે વડાપ્રધાન મોદીએ હંમેશા ભારતીય ખેડૂતો અને ડેરી ક્ષેત્રના હિતોનું રક્ષણ કર્યું છે. કરારમાં સંવેદનશીલ ક્ષેત્રોને સુરક્ષિત રાખવામાં આવ્યા છે તેવી ખાતરી સરકારે આપી છે.
સંસદની બહાર વિરોધ પક્ષોના સાંસદો સતત સૂત્રોચ્ચાર કરી રહ્યા છે અને સસ્પેન્ડ થયેલા ૮ સાંસદોના મુદ્દે ગૃહમાં હંગામો યથાવત છે. આ દરમિયાન "PM સાથે ચેડા થયા છે" તેવા પોસ્ટરો સાથે વિપક્ષી નેતાઓ રસ્તા પર ઉતર્યા છે.