દુબઈ:  એરપોર્ટ પર લાંબી કતારો, કલાકો સુધી ઇમિગ્રેશનની રાહ અને પાસપોર્ટ ચેકિંગની જૂની પદ્ધતિઓ હવે મુસાફરો માટે માથાનો દુખાવો બની રહી છે. આ મુદ્દે અમીરાત એરલાઇન્સના પ્રમુખ સર ટિમ ક્લાર્કે બુધવારે યુરોપિયન દેશોને આડે હાથ લીધા હતા. તેમણે સ્પષ્ટ શબ્દોમાં જણાવ્યું હતું કે, જે ડિજિટલ પાસપોર્ટ અને ઓટોમેટેડ એન્ટ્રી સિસ્ટમ યુરોપ હવે અપનાવવાની વાતો કરી રહ્યું છે, તે ટેકનોલોજી વર્ષોથી ઉપલબ્ધ છે અને UAE જેવા દેશોમાં સફળતાપૂર્વક કાર્યરત છે.

દુબઈની સફળતાનું ઉદાહરણ

ટિમ ક્લાર્કે દુબઈ ઇન્ટરનેશનલ એરપોર્ટ (DXB) ની પ્રશંસા કરતા કહ્યું કે, "અમે દુબઈમાં કોઈ પણ પ્રકારના શારીરિક અવરોધ વગર મુસાફરોને એરપોર્ટની અંદર અને બહાર લઈ જઈ શકીએ છીએ." દુબઈની સ્માર્ટ ગેટ્સ અને બાયોમેટ્રિક સિસ્ટમને કારણે મુસાફરોને ઇમિગ્રેશનમાં નહિવત સમય લાગે છે. તેમણે ઉમેર્યું કે યુરોપે યુકે અને યુએસએ જેવા દેશો પાસેથી શીખવું જોઈએ જેઓ પહેલેથી જ આ દિશામાં આગળ વધી ચૂક્યા છે.

ટેકનોલોજી છે, પણ ઈચ્છાશક્તિનો અભાવ?

ક્લાર્કના મતે, યુરોપિયન યુનિયનમાં ડિજિટલ પાસપોર્ટના અમલીકરણમાં વિલંબ પાછળનું કારણ ટેકનોલોજીનો અભાવ નથી, પરંતુ દેશો વચ્ચેના અલગ-અલગ રાજકીય એજન્ડા અને નિર્ણય લેવાની ધીમી પ્રક્રિયા છે. તેમણે આક્ષેપ કર્યો કે યુરોપિયન એરપોર્ટ્સ પર 'નોંધણી' કરવાની પ્રક્રિયા પણ અત્યંત જટિલ છે, જે મુસાફરો માટે મુશ્કેલી ઊભી કરે છે.

ઉડ્ડયન ક્ષેત્રનું ભવિષ્ય

ચર્ચામાં એ વાત પણ સામે આવી કે માત્ર જમીન પર જ નહીં, પણ આકાશમાં પણ ગીચતા વધી રહી છે. ઇન્ટરનેશનલ સિવિલ એવિએશન ઓર્ગેનાઈઝેશન (ICAO) ના પ્રમુખ તોશીયુકી ઓનુમાએ પણ સ્વીકાર્યું કે એરસ્પેસ મેનેજમેન્ટ પર વૈશ્વિક સર્વસંમતિ સાધવી હવે મુશ્કેલ બની રહી છે. ક્લાર્કે અંતમાં આશા વ્યક્ત કરી કે આગામી ૫ વર્ષમાં ટેકનોલોજીનો યોગ્ય ઉપયોગ કરીને મુસાફરીને વધુ સરળ બનાવવી એ જ વિશ્વના એરપોર્ટ્સ માટે પ્રાથમિકતા હોવી જોઈએ.