લખનૌ : શ્રી અયોધ્યા ધામમાં આવતા લાખો શ્રદ્ધાળુઓ માટે હવે વધુ એક આકર્ષણનું કેન્દ્ર ઉમેરાવા જઈ રહ્યું છે. મુખ્યમંત્રી યોગી આદિત્યનાથે બુધવારે મળેલી આવાસ અને શહેરી આયોજન વિભાગની બેઠકમાં માતા સીતાના જીવન પર આધારિત 'વૈદેહી આર્ટ ગેલેરી' સ્થાપવાનો નિર્દેશ આપ્યો છે. આ ગેલેરી અયોધ્યાના શ્રી રામ જન્મભૂમિ મંદિરની નજીક આવેલા વશિષ્ઠ ભવન સંકુલમાં તૈયાર કરવામાં આવશે.

આધુનિક ટેકનોલોજી અને આધ્યાત્મિકતાનો સંગમ

મુખ્યમંત્રીએ જણાવ્યું હતું કે, આ ગેલેરી માત્ર કલાનું સંગ્રહાલય નહીં, પરંતુ એક 'જીવંત સાંસ્કૃતિક અનુભવ કેન્દ્ર' હશે. જેમાં અત્યાધુનિક ડિજિટલ ટેકનોલોજી દ્વારા માતા સીતાના ત્યાગ, કરુણા, ધૈર્ય અને શક્તિના પાસાઓને પ્રદર્શિત કરવામાં આવશે. નવી પેઢી સીતા મૈયાના તેજસ્વી પાત્રથી પરિચિત થાય અને તેમના નૈતિક મૂલ્યોને આંતરિક કરે તેવો આ પ્રોજેક્ટનો મુખ્ય ઉદ્દેશ્ય છે.

મિથિલા કલા અને લોક પરંપરાની ઝલક

વૈદેહી આર્ટ ગેલેરીમાં બિહારની પ્રખ્યાત મિથિલા સંસ્કૃતિને ખાસ સ્થાન આપવામાં આવશે. ગેલેરીમાં મિથિલાની લોક પરંપરાઓ અને કલાના વિવિધ પાસાઓને એવી રીતે વણી લેવામાં આવશે કે મુલાકાતીઓ દૈવી વારસાનો સાક્ષાત અનુભવ કરી શકે. અયોધ્યાને વૈશ્વિક સાંસ્કૃતિક શહેર બનાવવાના સરકારના પ્રયાસોમાં આ ગેલેરી એક સીમાચિહ્નરૂપ સાબિત થશે.

મુખ્યમંત્રીના આ નિર્ણયથી અયોધ્યામાં ધાર્મિક પ્રવાસન સાથે સાંસ્કૃતિક શિક્ષણને પણ મોટો વેગ મળશે. રામલલાના દર્શને આવતા ભક્તો હવે 'વૈદેહી'ના દર્શન અને તેમના જીવન સંદેશનો જીવંત અનુભવ પણ લઈ શકશે.