કોલંબો: આજે શ્રીલંકા પોતાનો રાષ્ટ્રીય દિવસ ઉજવી રહ્યું છે, ત્યારે ભારતે પડોશી દેશને એક અત્યંત ભાવુક અને આધ્યાત્મિક ભેટ આપી છે. ગુજરાતના સુપ્રસિદ્ધ બૌદ્ધ સ્થળ 'દેવની મોરી' ખાતેથી મળી આવેલા ભગવાન બુદ્ધના પવિત્ર અવશેષો આજે ભારતીય વાયુસેનાના વિશેષ C-130J વિમાન દ્વારા કોલંબો લાવવામાં આવ્યા છે. ઇતિહાસમાં પ્રથમ વખત આ પવિત્ર અવશેષો આંતરરાષ્ટ્રીય પ્રદર્શન માટે વિદેશ મોકલવામાં આવ્યા છે, જે ભારતની 'નેબરહુડ ફર્સ્ટ' નીતિ અને સાંસ્કૃતિક જોડાણનું ઉત્કૃષ્ટ ઉદાહરણ છે.

ભવ્ય સ્વાગત અને રાજદ્વારી પ્રતિનિધિમંડળ

ગુજરાતના રાજ્યપાલ આચાર્ય દેવવ્રત અને નાયબ મુખ્યમંત્રી હર્ષ સંઘવીના નેતૃત્વમાં એક ઉચ્ચ સ્તરીય પ્રતિનિધિમંડળ આ પવિત્ર વારસા સાથે શ્રીલંકા પહોંચ્યું હતું. કોલંબો એરપોર્ટ પર શ્રીલંકાના બુદ્ધશાસન મંત્રી સુનિલ સેનેવી અને પ્રો. અબેયરથ્ના દ્વારા શાસ્ત્રોક્ત વિધિ અને સંપૂર્ણ રાજ્ય સન્માન સાથે અવશેષોનું સ્વાગત કરવામાં આવ્યું હતું. આ પવિત્ર અવશેષોને હવે કોલંબોના વિખ્યાત ગંગારામાયા મંદિરમાં લઈ જવામાં આવ્યા છે, જ્યાં આવતીકાલથી સામાન્ય જનતા તેમના દર્શન કરી શકશે.

પીએમ મોદીએ આપેલું વચન પૂરું થયું

મહત્વનું છે કે, એપ્રિલ ૨૦૨૫માં જ્યારે વડાપ્રધાન નરેન્દ્ર મોદીએ શ્રીલંકાની મુલાકાત લીધી હતી, ત્યારે તેમણે આ પવિત્ર અવશેષોને પ્રદર્શન માટે મોકલવાનું વચન આપ્યું હતું. બૌદ્ધ ધર્મ બંને દેશોને જોડતો એક મજબૂત સેતુ છે. ગુજરાતના અરવલ્લી જિલ્લામાં આવેલા દેવની મોરી સ્તૂપમાંથી મળેલા આ અવશેષો હજારો વર્ષ જૂના છે અને બૌદ્ધ અનુયાયીઓ માટે અત્યંત આસ્થાનું કેન્દ્ર છે.

આ ઐતિહાસિક ક્ષણ શ્રીલંકાના લોકો માટે માત્ર રાષ્ટ્રીય પર્વ જ નહીં, પરંતુ એક મહાન આધ્યાત્મિક ઉત્સવ બની ગઈ છે. ભારતના આ પગલાથી બંને દેશો વચ્ચેના મૈત્રીપૂર્ણ સંબંધો વધુ ગાઢ બનશે.