દુબઈ: સોશિયલ મીડિયા પર અત્યારે એક લેટરહેડ વાયરલ થઈ રહ્યો છે, જેમાં દાવો કરવામાં આવ્યો છે કે ઇન્ટરનેશનલ ક્રિકેટ કાઉન્સિલ (ICC) એ પાકિસ્તાની ક્રિકેટ ટીમ પર એક વર્ષનો પ્રતિબંધ લાદી દીધો છે. આ અફવાએ ત્યારે જોર પકડ્યું જ્યારે પાકિસ્તાને ૧૫ ફેબ્રુઆરીએ કોલંબોમાં રમાનારી ભારત સામેની T20 વર્લ્ડ કપ મેચમાંથી ખસી જવાની જાહેરાત કરી હતી. વાયરલ પત્રમાં તો ત્યાં સુધી કહેવાયું છે કે પાકિસ્તાનનો વાર્ષિક હિસ્સો ઘટાડી દેવામાં આવ્યો છે અને ૨૦૪૦ સુધી તેઓ કોઈ ટુર્નામેન્ટ હોસ્ટ નહીં કરી શકે.
જ્યારે આ વાયરલ પ્રેસ રિલીઝની ઝીણવટભરી તપાસ કરવામાં આવી, ત્યારે જાણવા મળ્યું કે તે સંપૂર્ણપણે એડિટ કરેલી અને 'નકલી' છે. આ પત્રમાં એવા ફોન્ટનો ઉપયોગ થયો છે જે ICC ક્યારેય વાપરતું નથી. સૌથી ચોંકાવનારી વાત એ છે કે આ નકલી દસ્તાવેજ પર BCCI સચિવ જય શાહની સહી કરવામાં આવી છે, જ્યારે નિયમ મુજબ ICCની સત્તાવાર પ્રેસ રિલીઝમાં આવી સહી હોતી નથી.
 ICC એ પાકિસ્તાન પર કોઈ પ્રતિબંધ મૂક્યો હોવાની સત્તાવાર પુષ્ટિ કરી નથી. ૧ ફેબ્રુઆરી, ૨૦૨૬ના રોજ જારી કરાયેલા અસલી નિવેદનમાં ICC એ માત્ર એટલું જ કહ્યું હતું કે પાકિસ્તાન દ્વારા ભારત સામેની મેચ છોડી દેવાનો નિર્ણય વૈશ્વિક ક્રિકેટ માટે અયોગ્ય છે. હાલમાં ICC અને પાકિસ્તાન ક્રિકેટ બોર્ડ વચ્ચે આ મામલે અનૌપચારિક વાટાઘાટો ચાલી રહી છે, પરંતુ કોઈ સસ્પેન્શન લાદવામાં આવ્યું નથી.
ક્રિકેટ ચાહકોને વિનંતી છે કે સોશિયલ મીડિયા પર ફેલાતી આવી સનસનાટીભરી અફવાઓ પર વિશ્વાસ ન કરે અને હંમેશા સત્તાવાર સ્ત્રોત દ્વારા મળેલી માહિતીની જ ખાતરી કરે.