નવી દિલ્હી: લદ્દાખને રાજ્યનો દરજ્જો અપાવવાની માંગ સાથે આંદોલન ચલાવતા પ્રખ્યાત પર્યાવરણવાદી સોનમ વાંગચુકની અટકાયત મામલે સુપ્રીમ કોર્ટે કેન્દ્ર સરકાર પાસે જવાબ માંગ્યો છે. જસ્ટિસ અરવિંદ કુમાર અને પી.બી. વરાલેની બેન્ચે અવલોકન કર્યું હતું કે વાંગચુકના હેલ્થ રિપોર્ટ ચિંતાજનક છે. કોર્ટે માનવીય અભિગમ અપનાવવા અને તેમની વધતી ઉંમર તેમજ સ્વાસ્થ્યને ધ્યાનમાં રાખી અટકાયતના આદેશ પર ફરીથી વિચાર કરવા મૌખિક સૂચન કર્યું છે.

કેન્દ્રનો ગંભીર આરોપ: 'આરબ સ્પ્રિંગ' જેવી ક્રાંતિની કોશિશ

સુનાવણી દરમિયાન કેન્દ્ર સરકાર વતી હાજર રહેલા વકીલોએ વાંગચુકની મુક્તિનો વિરોધ કર્યો હતો. એડિશનલ સોલિસિટર જનરલે દલીલ કરી હતી કે વાંગચુકે લેહમાં લોકોને ઉશ્કેર્યા હતા, જેના કારણે થયેલી હિંસામાં ૪ લોકોના મોત થયા હતા. કેન્દ્રએ એવો પણ આરોપ લગાવ્યો કે વાંગચુક નેપાળ, બાંગ્લાદેશ અને 'આરબ સ્પ્રિંગ' જેવા ઉદાહરણો આપીને સરકારને ઉથલાવી પાડવા માટે જનતાને ભડકાવતા હતા, જે રાષ્ટ્રીય સુરક્ષા માટે જોખમી છે.

પત્નીની અરજી: અટકાયત ગેરકાયદેસર અને મનસ્વી

બીજી તરફ, વાંગચુકની પત્ની ગીતાંજલી એંગ્મોએ નેશનલ સિક્યોરિટી એક્ટ (NSA) હેઠળની અટકાયતને પડકારી છે. તેમના વકીલ કપિલ સિબ્બલે કોર્ટને જણાવ્યું હતું કે પોલીસે પસંદગીના વિડિયોના આધારે વાંગચુકને નિશાન બનાવ્યા છે. વાંગચુકે પોતે હિંસાની નિંદા કરી હતી અને તેને લદ્દાખના શાંતિપૂર્ણ પ્રયાસો માટે અવરોધ ગણાવ્યો હતો. ત્રણ દાયકાથી શિક્ષણ અને પર્યાવરણ ક્ષેત્રે યોગદાન આપનાર વ્યક્તિને અચાનક 'રાષ્ટ્રવિરોધી' ઠેરવવા તે અવાજબી છે.

હાલમાં સોનમ વાંગચુક જોધપુર સેન્ટ્રલ જેલમાં છે. સુપ્રીમ કોર્ટમાં આ મામલે આવતીકાલે પણ દલીલો ચાલુ રહેશે. શું સરકાર વાંગચુકની તબિયતને આધારે નરમ વલણ અપનાવશે? તે જોવું રસપ્રદ રહેશે