નવી દિલ્હી, તા.5: સંસદનું શિયાળુ સત્ર અત્યારે રાજકીય અખાડો બની ગયું છે. ગુરુવારે રાજ્યસભામાં વિપક્ષના નેતા મલ્લિકાર્જુન ખડગે અને ગૃહના નેતા જે.પી. નડ્ડા વચ્ચે ભારે શાબ્દિક પ્રહારો જોવા મળ્યા હતા. વિવાદની શરૂઆત ત્યારે થઈ જ્યારે ખડગેએ આરોપ લગાવ્યો કે લોકસભામાં વિપક્ષના નેતા રાહુલ ગાંધીને બોલતા અટકાવવામાં આવી રહ્યા છે. ખડગેએ તીખા સ્વરે કહ્યું કે, જ્યારે રાહુલ ગાંધી દેશના હિતની વાત કરે છે, ત્યારે ભાજપને 'ખુજલી' (ખંજવાળ) ઉપડે છે.
ખડગેની આ ટિપ્પણીથી સત્તાધારી પક્ષ લાલચોળ થઈ ગયો હતો. જે.પી. નડ્ડાએ વળતો પ્રહાર કરતા કહ્યું કે, ખડગેજીએ સમજવું જોઈએ કે લોકસભાની બાબતોની ચર્ચા રાજ્યસભામાં ન થઈ શકે. નડ્ડાએ કોંગ્રેસ પર કટાક્ષ કરતા ઉમેર્યું કે, "તમારી પાર્ટીને એક 'અબોધ બાળક' (નિર્દોષ બાળક) ના બંધક ન બનાવો." તેમણે સ્પષ્ટ કર્યું કે વડાપ્રધાન મોદી તમામ ચર્ચાઓ માટે તૈયાર હતા, પરંતુ વિપક્ષે જ ગૃહને ચાલવા દીધું નથી.
સીતારમણે યાદ અપાવ્યું કેરળ અને રાજસ્થાન
આ ચર્ચામાં નાણામંત્રી નિર્મલા સીતારમણ પણ જોડાયા હતા. ખડગે દ્વારા 'લિંચિંગ' શબ્દનો પ્રયોગ કરવા બદલ તેમણે આકરી નારાજગી વ્યક્ત કરી હતી. તેમણે વળતો સવાલ કર્યો કે જ્યારે રાજસ્થાનમાં દરજીની હત્યા થઈ કે કેરળમાં શિક્ષકના હાથ કાપી નાખવામાં આવ્યા, ત્યારે કોંગ્રેસ સરકારોએ શું કર્યું હતું? તેમણે ખડગેના નિવેદનને રેકોર્ડ પરથી હટાવવાની પણ માંગ કરી હતી.
કેમ મચ્યો છે આ હોબાળો?
હકીકતમાં, પૂર્વ આર્મી ચીફ જનરલ એમ.એમ. નરવણેના અપ્રકાશિત પુસ્તકમાં ભારત-ચીન સરહદ વિવાદ અંગે જે ઉલ્લેખ છે, તે મુદ્દે રાહુલ ગાંધી બોલવા માંગતા હતા. વિપક્ષનો દાવો છે કે તેમને જાણીજોઈને તક આપવામાં આવી રહી નથી. બીજી તરફ, ભાજપનું કહેવું છે કે વિપક્ષ માત્ર હંગામો કરવા માંગે છે અને રાષ્ટ્રપતિના ભાષણ પરના આભાર પ્રસ્તાવમાં પણ અવરોધ ઉભો કરી રહ્યો છે.
યુદ્ધના મુખ્ય બિંદુઓ:
•    ખડગેનો પ્રહાર: "તમે તમારી ભૂલો છુપાવવા માટે લોકસભાને લકવાગ્રસ્ત કરી રહ્યા છો."
•    નડ્ડાનો જવાબ: "લોકશાહી જોખમમાં છે તેમ કહેવું ખોટું છે, તમે પોતે ગૃહ ચાલવા દેતા નથી."
•    ઐતિહાસિક ઘટના: 2004 પછી પ્રથમ વખત પીએમના જવાબ વગર રાષ્ટ્રપતિનું ભાષણ પસાર થયું.
•    જૂના નેતાઓનું અપમાન: ખડગેએ નેહરુ અને ઇન્દિરા ગાંધી વિરુદ્ધની ટિપ્પણીઓ સામે પણ વાંધો ઉઠાવ્યો.