નવી દિલ્હી, તા.5: સંસદમાં વિપક્ષી સાંસદોના સસ્પેન્શન અને રાહુલ ગાંધીને બોલતા અટકાવવાના મુદ્દે કોંગ્રેસના નેતા પ્રિયંકા ગાંધી વાડ્રાએ કેન્દ્ર સરકાર સામે મોરચો ખોલ્યો છે. બુધવારે મીડિયા સાથે વાતચીત કરતા તેમણે એનડીએ સરકાર પર પ્રહાર કરતા પૂછ્યું કે, “સંસદ તો લોકશાહીનું મંદિર છે, તો પછી સરકાર અહીં અસંમતિ અને ચર્ચાને દબાવવા આટલી બધી કોશિશ કેમ કરી રહી છે?”
લોકસભામાંથી આઠ વિપક્ષી સાંસદોને બજેટ સત્રના બાકીના સમય માટે સસ્પેન્ડ કરવામાં આવ્યા તેને પ્રિયંકાએ દુર્ભાગ્યપૂર્ણ ગણાવ્યું હતું. તેમણે આરોપ લગાવ્યો કે દરેક સત્રમાં વિપક્ષના અવાજને દબાવવો એ હવે સરકારની આદત બની ગઈ છે. તેમણે કહ્યું કે જ્યારે વિપક્ષી નેતા (LoP) કોઈ પુરાવા સાથે વાત કરે છે, ત્યારે સરકાર ડરી જાય છે.
ચાઈના બોર્ડર અને આર્મી ચીફનું પુસ્તક
પ્રિયંકા ગાંધીએ ભૂતપૂર્વ આર્મી ચીફ જનરલ એમ.એમ. નરવણેના તે પુસ્તકનો ઉલ્લેખ કર્યો જે હજુ સુધી પ્રકાશિત થઈ શક્યું નથી. તેમણે દાવો કર્યો કે આ પુસ્તકમાં ભારત-ચીન સરહદ વિવાદ સમયે પીએમ, ગૃહમંત્રી અને રક્ષામંત્રીની પ્રતિક્રિયા અંગે મહત્વની વાતો છે. પ્રિયંકાએ કહ્યું, “ચીની સૈનિકો આપણી સરહદમાં ઘૂસી રહ્યા હતા ત્યારે આપણા ટોચના નેતૃત્વનું પાત્ર કેવું હતું, તે આ પુસ્તક પરથી સ્પષ્ટ થાય છે, અને એટલે જ સરકાર તેનાથી ડરે છે.”
એપ્સટિન ફાઇલ્સ અને ગંભીર આરોપ
આટલું જ નહીં, પ્રિયંકા ગાંધીએ તાજેતરમાં ચર્ચામાં આવેલી ‘એપ્સટિન ફાઇલ્સ’નો મુદ્દો પણ ઉછાળ્યો હતો. તેમણે આરોપ લગાવ્યો કે એક સજા પામેલા સેક્સ ટ્રાફિકર અને ગુનેગાર સાથે સરકારનો શું સંપર્ક હતો, તે બાબત દસ્તાવેજોમાં છે. તેમણે પ્રશ્ન કર્યો કે જો દેશના હિત અને આવા મહત્વના દસ્તાવેજો પર સંસદમાં ચર્ચા નહીં થાય, તો પછી કયા મુદ્દે થશે?
વિવાદના મુખ્ય કારણો:
•    સસ્પેન્શન: ‘અસભ્ય વર્તન’ના નામે 8 વિપક્ષી સાંસદોને બહાર કરાયા.
•    રાહુલ ગાંધીનો બચાવ: પ્રિયંકાએ કહ્યું કે રાહુલ જે સ્ત્રોત ટાંકી રહ્યા છે તે પ્રમાણિત છે, તો તેમને કેમ અટકાવવામાં આવે છે?
•    ચીન મુદ્દે હોબાળો: પૂર્વી લદ્દાખમાં સરહદી તણાવ પર વિપક્ષે સરકારને ઘેરી.
•    ગૃહમાં હોબાળો: આર્મી ચીફના પુસ્તકનો સંદર્ભ આપતી વખતે વિપક્ષી સભ્યોએ અધ્યક્ષની ખુરશી તરફ કાગળો ફેંક્યા હોવાનો આક્ષેપ.