નવી દિલ્હી: સંસદના બજેટ સત્ર 2026 દરમિયાન રાજ્યસભામાં આજે ભારે હંગામો જોવા મળ્યો હતો. રાષ્ટ્રપતિના અભિભાષણ પરના આભાર પ્રસ્તાવની ચર્ચામાં ગૃહના નેતા જેપી નડ્ડા અને વિપક્ષના નેતા મલ્લિકાર્જુન ખડગે સામસામે આવી ગયા હતા. વાતાવરણ ત્યારે ગરમાયું જ્યારે જેપી નડ્ડાએ રાહુલ ગાંધીનું નામ લીધા વગર તેમને "નિર્દોષ બાળક" કહીને સંબોધ્યા અને કોંગ્રેસ પક્ષ તેમના હાથમાં બંધક હોવાનો ગંભીર આરોપ લગાવ્યો.
જેપી નડ્ડાએ ખડગેને ઉદ્દેશીને કહ્યું- "તમે મારાથી ઘણા વરિષ્ઠ અને અનુભવી છો, પરંતુ મારે એક વાત કહેવી છે કે તમારા પક્ષને એક નિર્દોષ બાળકના હાથમાં બંધક ન બનાવો. અજ્ઞાનતા અને અહંકારનું મિશ્રણ ખૂબ જ ખતરનાક હોય છે, અને અત્યારે તમારી પાર્ટીમાં આ જ જોવા મળી રહ્યું છે." નડ્ડાએ વધુમાં ઉમેર્યું કે પીએમ મોદી લોકસભામાં જવાબ આપવા તૈયાર હતા, પરંતુ વિપક્ષે ગૃહ ચાલવા દીધું નહીં.
"તમે તો બંધુઆ મજૂર છો": નડ્ડાના આ કટાક્ષથી મલ્લિકાર્જુન ખડગે અત્યંત ગુસ્સે ભરાયા હતા. તેમણે વળતો જવાબ આપતા કહ્યું કે, "તમે વિપક્ષના નેતા માટે જે શબ્દો વાપર્યા છે તે અત્યંત નિંદનીય છે. લોકશાહીમાં જો વિપક્ષને બોલવા દેવામાં નહીં આવે તો અમે અવાજ ઉઠાવતા રહીશું." ખડગેએ ભાજપ પર પ્રહાર કરતા કહ્યું, "તમારી પાર્ટીમાં તો કોઈ બોલી શકતું નથી, મોદીજીએ તમને બધાને બંધક બનાવી લીધા છે."
ખડગેએ શાસક પક્ષના સભ્યો માટે "બંધુઆ મજૂર" (વેઠિયા મજૂર) શબ્દનો ઉપયોગ કર્યો હતો, જેની સામે સત્તાધારી પક્ષે ભારે વિરોધ નોંધાવ્યો હતો. બાદમાં સ્પીકરે આ વિવાદાસ્પદ શબ્દને ગૃહની કાર્યવાહીમાંથી હટાવવાનો આદેશ આપ્યો હતો.
વાદ-વિવાદના મુખ્ય મુદ્દાઓ:
ભારત-અમેરિકા વેપાર કરાર: વિપક્ષે આ કરારની વિગતો જાહેર કરવાની માંગ કરી, જેની પર પીયૂષ ગોયલે સ્પષ્ટતા આપી.
લોકશાહી પર જોખમ: વિપક્ષે લોકશાહી ખતરામાં હોવાનો આરોપ લગાવ્યો, જેને જેપી નડ્ડાએ સંપૂર્ણપણે ખોટો ગણાવી ફગાવી દીધો.
સમયની મર્યાદા: નડ્ડાએ કહ્યું કે ખડગેને નિર્ધારિત સમય કરતાં 20 મિનિટ વધુ બોલવા દેવામાં આવ્યા હતા, છતાં તેઓ અસંતુષ્ટ છે.
રાજ્યસભામાં ચાલી રહેલી આ શાબ્દિક ખેંચતાણે સાબિત કરી દીધું છે કે આગામી દિવસોમાં પણ બજેટ સત્ર તોફાની બની રહેશે