લખનૌ:ઉત્તર પ્રદેશના મુખ્યમંત્રી યોગી આદિત્યનાથે ખેડૂતોના સશક્તિકરણ માટે વધુ એક ક્રાંતિકારી પગલાની જાહેરાત કરી છે. ગુરુવારે લખનૌમાં આયોજિત 'સ્ટેટ ક્રેડિટ સેમિનાર'માં સીએમ યોગીએ જણાવ્યું કે, ડિજિટલ ગવર્નન્સના પ્રતાપે હવે રાજ્યના ખેડૂતોને કિસાન ક્રેડિટ કાર્ડ (KCC) દ્વારા લોન લેવા માટે મહિનાઓ સુધી બેંકોના ધક્કા ખાવા નહીં પડે. e-KCC ટેકનોલોજીની મદદથી હવે પાત્ર ખેડૂતોને માત્ર 5 મિનિટમાં લોન મંજૂર થઈ રહી છે.
સીએમ યોગીએ ગર્વ સાથે જણાવ્યું કે વર્ષ 2026-27 માટે રાજ્યનું કૃષિ ધિરાણ લક્ષ્ય ₹3 લાખ કરોડ રાખવામાં આવ્યું છે, જે ગત વર્ષ કરતા 13% વધુ છે. તેમણે ઉમેર્યું કે, "અગાઉ ખેડૂતોને લોન માટે 25 થી 30 દિવસ રાહ જોવી પડતી હતી, પરંતુ આજે ટેકનોલોજીએ આખી પ્રક્રિયા બદલી નાખી છે. આ જ સાચું સુશાસન છે."
 ખેડૂતોની આર્થિક સ્થિતિ સુધારવા માટે યોગી સરકારે વ્યાજ દરમાં પણ મોટો ઘટાડો કર્યો છે. અગાઉ ખેડૂતોને 11 ટકાના ઊંચા વ્યાજે લોન લેવી પડતી હતી, પરંતુ હવે નાના અને સીમાંત ખેડૂતોને માત્ર 5 થી 6 ટકાના વ્યાજ દરે લોન આપવામાં આવી રહી છે. બાકીના વ્યાજની રકમ સરકાર સબસિડી તરીકે ભોગવે છે, જેથી ખેડૂતો નવી ટેકનોલોજી અને સાધનોમાં રોકાણ કરી શકે.
 ₹36 લાખ કરોડનું લક્ષ્ય: મુખ્યમંત્રીએ રાજ્યની પ્રગતિના આંકડા રજૂ કરતા કહ્યું કે, 2016માં ઉત્તર પ્રદેશનું અર્થતંત્ર ₹11.7 લાખ કરોડ હતું, જે આ માર્ચ સુધીમાં વધીને ₹36 લાખ કરોડ સુધી પહોંચી જશે. દસ વર્ષ પહેલા દેશના જીડીપીમાં યુપીનો ફાળો 8 ટકા હતો, જે હવે વધીને 9.5 ટકા થયો છે. એટલું જ નહીં, રાજ્યમાં માથાદીઠ આવક પણ ₹43,000 થી વધીને ₹1.20 લાખ પર પહોંચી ગઈ છે.
ખેતીવાડીમાં ટેકનોલોજી અને સુવિધાઓનો સમન્વય:
સિંચાઈમાં નંબર 1: યુપી દેશનું પહેલું રાજ્ય છે જ્યાં 86% જમીન સિંચાઈ હેઠળ છે.
મફત વીજળી: 16 લાખ ટ્યુબવેલ માટે ખેડૂતોને મફત વીજળી અને નહેરોનું પાણી પણ મફત આપવામાં આવે છે.
AI કૃષિ પ્લેટફોર્મ: પીએમ મોદીના વિઝન મુજબ ખેતીમાં આર્ટિફિશિયલ ઇન્ટેલિજન્સનો ઉપયોગ કરવા પર ભાર.
પીએમ કુસુમ યોજના: એક લાખ ખેડૂતોને સોલર પેનલ આપીને ઉર્જા ક્ષેત્રે આત્મનિર્ભર બનાવ્યા.
સીએમ યોગીએ બેંકોને પણ અપીલ કરી છે કે તેઓ લોન આપવાની શરતો વધુ સરળ બનાવે જેથી FPO અને નાના ઉદ્યોગ સાહસિકો રાજ્યના વિકાસમાં વધુ યોગદાન આપી શકે.