વોશિંગ્ટન, તા. 6: અમેરિકાના રાષ્ટ્રપતિ ડોનાલ્ડ ટ્રમ્પના વહીવટીતંત્રે ઇમિગ્રેશન કાયદાના કડક અમલીકરણના ભાગરૂપે એક સનસનાટીભર્યો ડેટાબેઝ જાહેર કર્યો છે. "વર્સ્ટ ઓફ ધ વર્સ્ટ" (સૌથી ખરાબમાં ખરાબ) ગણાવવામાં આવેલી આ ગુનાહિત યાદીમાં 89 ભારતીય મૂળના વ્યક્તિઓના નામ સામે આવતા ખળભળાટ મચી ગયો છે. હોમલેન્ડ સિક્યુરિટી વિભાગ (DHS) દ્વારા જારી કરાયેલ આ યાદીમાં એવા વિદેશી નાગરિકોનો સમાવેશ થાય છે જેઓ અમેરિકામાં ગેરકાયદેસર રીતે રહેતા હતા અને ગંભીર ગુનાઓમાં સંડોવાયેલા છે.
આ જાહેર ડેટાબેઝમાં કુલ 25,000 વ્યક્તિઓની વિગતો આપવામાં આવી છે, જેમાં તેમના નામ, ફોટોગ્રાફ્સ અને ગુનાની પ્રકૃતિનો ઉલ્લેખ છે. આ યાદીમાં સામેલ લોકો પર હત્યા, જાતીય શોષણ અને ડ્રગ્સની હેરાફેરી જેવા અત્યંત ગંભીર આરોપો છે. હોમલેન્ડ સિક્યુરિટી વિભાગે સોશિયલ મીડિયા પર આક્રમક વલણ અપનાવતા જણાવ્યું હતું કે, "આ તે રાક્ષસો છે જેમણે આપણા સમુદાયોને આતંકિત કર્યા છે. જ્યાં સુધી આમાંથી દરેક વ્યક્તિને દેશની બહાર ન કાઢવામાં આવે ત્યાં સુધી અમે અટકીશું નહીં."
ટ્રમ્પ વહીવટીતંત્રના જણાવ્યા અનુસાર, આ યાદી માત્ર એક 'સ્નેપશોટ' છે અને હજુ મોટા પાયે ઓપરેશન ચાલુ છે. રાષ્ટ્રપતિ ટ્રમ્પે તેમના બીજા કાર્યકાળના પ્રથમ દિવસથી જ સરહદ પર કટોકટી જાહેર કરી છે અને 'ક્રિમિનલ એલિયન્સ'ને તાત્કાલિક દેશનિકાલ કરવાના આદેશો આપ્યા છે. ICE અને CBP જેવી એજન્સીઓ હાલમાં આ ડેટાબેઝના આધારે સામૂહિક દેશનિકાલની પ્રક્રિયાને વેગ આપી રહી છે.
જોકે, આ કડક કાર્યવાહીને કારણે અમેરિકામાં રાજકીય ગરમાવો પણ જોવા મળી રહ્યો છે. ડેમોક્રેટ્સ અને કેટલાક રિપબ્લિકન નેતાઓએ આ પદ્ધતિની ટીકા કરી છે. સેનેટ ડેમોક્રેટ્સે તો હોમલેન્ડ સિક્યુરિટી વિભાગનું ભંડોળ પણ અટકાવી દીધું છે અને માંગ કરી છે કે ધરપકડ દરમિયાન અધિકારીઓએ બોડી કેમેરા પહેરવા જોઈએ અને માસ્કનો ઉપયોગ ટાળવો જોઈએ. વિવાદો છતાં, ટ્રમ્પ સરકાર પોતાના 'અમેરિકા ફર્સ્ટ' એજન્ડા હેઠળ ગેરકાયદેસર ઇમિગ્રન્ટ્સ સામે ઝુંબેશ ચાલુ રાખવા મક્કમ દેખાય છે.