નવી દિલ્હી, તા. 6: છેલ્લા કેટલાક દિવસોથી સોશિયલ મીડિયા પર દિલ્હીમાં છોકરીઓ ગુમ થવા અંગેના ભયાનક મેસેજ અને વીડિયો વાયરલ થઈ રહ્યા છે. જોકે, દિલ્હી પોલીસે શુક્રવારે આ મામલે ચોંકાવનારો ખુલાસો કર્યો છે. પોલીસે જણાવ્યું છે કે, રાજધાનીમાં ગભરાટ ફેલાવવા માટે સોશિયલ મીડિયા પર 'પેઇડ પ્રમોશન' (પૈસા આપીને જાહેરાત) દ્વારા ખોટા આંકડા અને અફવાઓ ફેલાવવામાં આવી રહી છે. નાણાકીય લાભ ખાતર લોકોમાં ડર પેદા કરનારા તત્વો સામે પોલીસે કડક કાર્યવાહીની ચેતવણી આપી છે.
શું કહે છે પોલીસના સત્તાવાર આંકડા?
સોશિયલ મીડિયા પર એવો દાવો કરવામાં આવી રહ્યો છે કે દિલ્હીમાં છોકરીઓ ગુમ થવાના કિસ્સામાં મોટો ઉછાળો આવ્યો છે, પરંતુ પોલીસનો ડેટા કંઈક અલગ જ વાસ્તવિકતા દર્શાવે છે:
•    જાન્યુઆરી 2026: આ વર્ષના પ્રથમ મહિનામાં 1,777 લોકો ગુમ થયાની નોંધ થઈ છે, જે છેલ્લા બે વર્ષની માસિક સરેરાશ કરતા ઓછી છે.
•    વર્ષ 2024 અને 2025: દિલ્હીમાં 2024માં કુલ 24,893 અને 2025માં 24,508 ગુમ થવાના કિસ્સા નોંધાયા હતા.
•    પોલીસના જણાવ્યા મુજબ, દિલ્હીમાં ગુમ થવાનો દર દર 1 લાખની વસ્તીએ 122 છે, જે લંડન (254) અને અમેરિકા (138) કરતા ઘણો ઓછો છે.
નાની વાતોમાં નોંધાય છે રિપોર્ટ
પોલીસે સ્પષ્ટતા કરી છે કે દિલ્હીમાં ઓનલાઇન અને એપ-આધારિત રિપોર્ટિંગ સિસ્ટમ હોવાથી, લોકો સાવચેતીના ભાગરૂપે નાની વાતોમાં પણ ફરિયાદ નોંધાવે છે. ઘણીવાર બાળક શાળાએથી મોડું આવે અથવા કોઈનો ફોન થોડીવાર માટે ન લાગે તો પણ ફરિયાદ કરવામાં આવે છે. આવા કિસ્સાઓમાં વ્યક્તિ ઝડપથી મળી જાય છે, પરંતુ તેના પરિવારજનો પોલીસને જાણ કરવાનું ભૂલી જાય છે, જેના કારણે સત્તાવાર આંકડાઓમાં તે નામ 'ગુમ' તરીકે જ બોલે છે.
દિલ્હી પોલીસે નાગરિકોને અપીલ કરી છે કે સોશિયલ મીડિયા પર કોઈપણ અજાણી પોસ્ટ જોઈને ગભરાશો નહીં અને આવી પોસ્ટ્સને ખરાઈ કર્યા વિના શેર ન કરો. પોલીસ હાલમાં એવા એકાઉન્ટ્સની તપાસ કરી રહી છે જેમણે પૈસા આપીને આ ગભરાટ ફેલાવવાની કોશિશ કરી છે.