નવી દિલ્હી:અમેરિકાના ત્રણ દિવસીય પ્રવાસ પરથી પરત ફરતા જ વિદેશ મંત્રી એસ. જયશંકરે ભારત-અમેરિકા વચ્ચેના નવા વેપાર કરાર ને લઈને અત્યાર સુધીની સૌથી મોટી અપડેટ આપી છે. તેમણે વોશિંગ્ટનમાં યુએસ સેક્રેટરી ઓફ સ્ટેટ માર્કો રુબિયો અને રાષ્ટ્રપતિ ડોનાલ્ડ ટ્રમ્પના દૂતો સાથે મુલાકાત કર્યા બાદ જણાવ્યું કે, આ ઐતિહાસિક ડીલ હવે તેના અંતિમ તબક્કામાં છે અને ગણતરીના દિવસોમાં જ તેની સંપૂર્ણ વિગતો જાહેર કરવામાં આવશે.
 આ ડીલ હેઠળ સૌથી મોટી રાહત ટેરિફમાં જોવા મળી શકે છે. અહેવાલો મુજબ, અમેરિકા ભારતીય ચીજવસ્તુઓ પર લાદવામાં આવેલા પારસ્પરિક ટેરિફને 25% થી ઘટાડીને 18% કરવા સંમત થયું છે. આ નિર્ણયથી ભારતના ટેક્સટાઇલ, લેધર અને જેમ્સ એન્ડ જ્વેલરી જેવા શ્રમ-સઘન ક્ષેત્રોને વૈશ્વિક બજારમાં મોટી સ્પર્ધાત્મક ધાર મળશે. જયશંકરે સોશિયલ મીડિયા પર પોસ્ટ કરીને લખ્યું કે, "આ ડીલ બંને દેશોમાં રોજગારી ઉભી કરશે અને 'મેક ઈન ઈન્ડિયા' ને પ્રોત્સાહન આપશે."
આ ડીલના ભાગરૂપે ભારતે રશિયા પાસેથી તેલની ખરીદીમાં ઘટાડો કરવા અને અમેરિકા તેમજ વેનેઝુએલા પાસેથી ઉર્જા સંસાધનોની આયાત વધારવા અંગે સંકેત આપ્યા હોવાની ચર્ચા છે. ભારત અમેરિકા પાસેથી આશરે $500 અબજની ઉર્જા અને ટેકનોલોજીની ખરીદી કરી શકે છે. આ પગલાથી અમેરિકા દ્વારા ભારત પર લાદવામાં આવેલા વધારાના પ્રતિબંધાત્મક ટેરિફ પણ દૂર થવાની શક્યતા છે.
જ્યારે સરકાર આ ડીલને માસ્ટરસ્ટ્રોક ગણાવી રહી છે, ત્યારે સોશિયલ મીડિયા પર કેટલાક લોકો અમેરિકા પરના અતિશય ભરોસાને લઈને ચિંતા પણ વ્યક્ત કરી રહ્યા છે. જોકે, વ્યૂહાત્મક નિષ્ણાતો માને છે કે યુરોપિયન યુનિયન (EU) સાથેના તાજેતરના FTA બાદ અમેરિકા સાથેની આ ડીલ ભારતને વિશ્વની નવી સપ્લાય ચેઈન હબ તરીકે સ્થાપિત કરવામાં મદદરૂપ થશે.
હવે સૌની નજર આગામી 4-5 દિવસમાં આવનારા સંયુક્ત નિવેદન પર ટકેલી છે, જે ભારત-યુએસ વ્યૂહાત્મક ભાગીદારીના ભવિષ્યનો માર્ગ નક્કી કરશે.