કુર્નૂલ :  વિશ્વપ્રસિદ્ધ તિરુપતિ બાલાજી મંદિરના પ્રસાદ એવા પવિત્ર લાડુને લઈને ચાલી રહેલો વિવાદ હવે એક અત્યંત ચોંકાવનારા વળાંક પર આવી ગયો છે. આંધ્રપ્રદેશના મુખ્યમંત્રી એન. ચંદ્રબાબુ નાયડુએ કુર્નૂલની એક સભામાં રુંવાડા ઉભા કરી દે તેવો દાવો કર્યો છે કે પાછલી જગન મોહન રેડ્ડી સરકારના શાસનકાળ દરમિયાન લાડુ બનાવવા માટે જે ઘી વપરાતું હતું, તેમાં બાથરૂમ સાફ કરવાના કેમિકલ્સ જેવી જટિલ ભેળસેળ કરવામાં આવતી હતી. નાયડુના આ નિવેદને માત્ર આંધ્રપ્રદેશમાં જ નહીં પણ સમગ્ર દેશના હિન્દુ સંગઠનો અને શ્રદ્ધાળુઓમાં ભારે રોષ પેદા કર્યો છે, કારણ કે આ આરોપ સીધો ભગવાન વેંકટેશ્વરના પ્રસાદની શુદ્ધતા પર છે.

આ કેસમાં તપાસની આંચ હવે વધુ તેજ બની છે, કારણ કે અગાઉ માત્ર પ્રાણીની ચરબીના જ આરોપો હતા, પરંતુ હવે રાસાયણિક ભેળસેળની વાત સામે આવતા ખળભળાટ મચી ગયો છે. મુખ્યમંત્રીએ દાવો કર્યો છે કે તિરુમાલા તિરુપતિ દેવસ્થાનમ ના ભૂતપૂર્વ અધ્યક્ષ વાય.વી. સુબ્બા રેડ્ડીએ પોતે પ્રસાદમાં થયેલા આ ચેડાંની કબૂલાત કરી છે. ફેબ્રુઆરી ૨૦૨૫માં આ મામલે ભોલે બાબા ડેરી અને વૈષ્ણવી ડેરીના સંચાલકો સહિત ચાર લોકોની ધરપકડ કરવામાં આવી હતી, જે બાદ SIT અને CBI જેવી તપાસ એજન્સીઓ આ કૌભાંડના મૂળ સુધી પહોંચવા મથી રહી છે.

ચંદ્રબાબુ નાયડુએ સ્પષ્ટ કર્યું કે તેમની સરકાર આવ્યા બાદ પ્રસાદની ગુણવત્તામાં નોંધપાત્ર સુધારો કરવામાં આવ્યો છે અને પવિત્રતા પુનઃસ્થાપિત કરવા માટે શાંતિ હોમમ જેવા ધાર્મિક વિધિઓ પણ કરવામાં આવ્યા છે. બીજી તરફ, YSR કોંગ્રેસ આ આરોપોને રાજકીય રીતે પ્રેરિત ગણાવી રહી છે. જોકે, લેબોરેટરીના અહેવાલો અને ધરપકડ કરાયેલા ડેરી સંચાલકોની પૂછપરછમાં જે રીતે એક પછી એક સ્ફોટક વિગતો બહાર આવી રહી છે, તે જોતા આ વિવાદ ટૂંક સમયમાં શમે તેમ લાગતું નથી. ભક્તો હવે આ મામલે જવાબદારો સામે કડકમાં કડક સજાની માંગ કરી રહ્યા છે.