વૈશાલી: બિહારમાં સોનાની લૂંટ ચલાવીને પોલીસની ઊંઘ હરામ કરી દેનાર કુખ્યાત ગુનેગાર પ્રિન્સ કુમાર ઉર્ફે અભિજીતનો આજે અંત આવ્યો છે. પટના STF અને વૈશાલી પોલીસના સંયુક્ત ઓપરેશનમાં હનુમાન નગર કોલોનીમાં થયેલા ભીષણ એન્કાઉન્ટરમાં આ લૂંટારો માર્યો ગયો છે. પ્રિન્સ પર અનેક હાઈ-પ્રોફાઈલ લૂંટના કેસ નોંધાયેલા હતા, જેમાં પૂર્ણિયા અને આરામાં થયેલી પ્રખ્યાત તનિષ્ક જ્વેલર્સની લૂંટ મુખ્ય હતી.
ઘરમાં છુપાયો હતો અને પોલીસ પર કર્યું ફાયરિંગ
પોલીસને ગુપ્ત બાતમી મળી હતી કે પ્રિન્સ હનુમાન નગર વિસ્તારના એક ઘરમાં આશરો લઈને બેઠો છે. બાતમીના આધારે STF અને સ્થાનિક પોલીસની ટીમે આખા વિસ્તારને ચારેબાજુથી ઘેરી લીધો હતો. પોલીસે તેને આત્મસમર્પણ (શરણાગતિ) કરવા ચેતવણી આપી હતી, પરંતુ ગુનાના રસ્તે ચઢેલા પ્રિન્સે પોલીસ પર અંધાધૂંધ ગોળીબાર શરૂ કરી દીધો હતો. સ્વબચાવમાં પોલીસે કરેલા જવાબી ફાયરિંગમાં પ્રિન્સ ગંભીર રીતે ઘાયલ થયો હતો. તેને તાત્કાલિક હોસ્પિટલ લઈ જવામાં આવ્યો, જ્યાં ડોક્ટરોએ તેને મૃત જાહેર કર્યો હતો.
300 કિલો સોનાની લૂંટનો ઈતિહાસ
પ્રિન્સ કુમાર કોઈ સામાન્ય ગુનેગાર નહોતો. તે આંતરરાજ્ય ગેંગનો માસ્ટરમાઇન્ડ હતો જેણે અત્યાર સુધીમાં અલગ-અલગ જગ્યાએથી અંદાજે 300 કિલો જેટલું સોનું લૂંટ્યું હોવાનું પોલીસ રેકોર્ડમાં નોંધાયેલું છે. પૂર્ણિયા અને આરાના તનિષ્ક શોરૂમમાં તેણે જે ફિલ્મી ઢબે લૂંટ ચલાવી હતી, તેનાથી સમગ્ર બિહારનું વહીવટીતંત્ર ચોંકી ગયું હતું. હથિયારોની હેરાફેરી અને હત્યાના પ્રયાસ જેવા અનેક ગુનાઓમાં પોલીસ તેને વર્ષોથી શોધી રહી હતી.
આ એન્કાઉન્ટર બાદ પોલીસે ઘટનાસ્થળેથી હથિયારો અને કારતુસ જપ્ત કર્યા છે. પ્રિન્સના મોતે બિહારમાં જ્વેલર્સ અને વેપારીઓએ રાહતનો શ્વાસ લીધો છે. પોલીસ હવે એ તપાસમાં લાગી છે કે આ ગેંગના અન્ય કયા સભ્યો હજુ પણ સક્રિય છે અને લૂંટાયેલું સોનું ક્યાં છુપાવવામાં આવ્યું છે.