બુલંદશહેર: ઉત્તર પ્રદેશના બુલંદશહેર જિલ્લામાં એક સોશિયલ મીડિયા ઇન્ફ્લુએન્સર સાથે પોલીસ સ્ટેશનમાં જ અત્યંત શરમજનક વર્તન થયું હોવાની ઘટના પ્રકાશમાં આવી છે. ડાન્સ વીડિયો દ્વારા જાણીતી આ મહિલાએ પોલીસ કર્મચારી કુલદીપ રાઠી પર જાતીય સતામણી અને મદદના બદલામાં અયોગ્ય લાભ માંગવાનો ગંભીર આરોપ લગાવ્યો છે.
શું છે સમગ્ર મામલો?
પીડિતાના જણાવ્યા અનુસાર, ફૈઝ અંસારી નામનો એક યુવક તેને લાંબા સમયથી ઓનલાઈન હેરાન કરી રહ્યો હતો. અંસારી તેના વીડિયો ઇન્સ્ટાગ્રામ પર અપમાનજનક ટિપ્પણીઓ સાથે ફરીથી પોસ્ટ કરતો હતો. આ હેરાનગતિથી કંટાળીને મહિલા જ્યારે સ્થાનિક પોલીસ સ્ટેશન પહોંચી, ત્યારે તેને પોલીસકર્મી કુલદીપ રાઠીનો સંપર્ક કરવા કહેવામાં આવ્યું હતું.
પોલીસકર્મીની નિર્લજ્જતાની હદ
મહિલાનો આરોપ છે કે મદદ કરવાને બદલે રાઠીએ પોતે જ તેને હેરાન કરવાનું શરૂ કરી દીધું. "તે મને મોડી રાત્રે ફોન કરતો અને ઇનબોક્સમાં 'મને તું ગમે છે', 'તારી સાથે સેક્સ કરવા માંગુ છું' જેવા ગંદા મેસેજ મોકલતો હતો," તેમ પીડિતાએ રડતા રડતા જણાવ્યું હતું. મહિલાએ વધુમાં દાવો કર્યો કે જ્યારે તેણે વિરોધ કર્યો, ત્યારે અધિકારીએ આરોપી અંસારીનો પક્ષ લીધો અને તેના પરિવારને મહિલાના ઘરે મોકલી જાનથી મારી નાખવાની ધમકી પણ અપાવી.
ન્યાય માટે SSP ને લગાવી ગુહાર
સતત માનસિક ત્રાસ અને પોલીસના આવા વલણથી કંટાળેલી મહિલાએ આત્મહત્યા કરવાનું પણ વિચાર્યું હતું, પરંતુ અંતે હિંમત ભેગી કરી તેણે વરિષ્ઠ પોલીસ અધિક્ષક (SSP) નો સંપર્ક કર્યો. ઘટનાની ગંભીરતા જોતા SSP એ તાત્કાલિક અસરથી આરોપીઓ સામે FIR નોંધવા અને તપાસ કરવાના આદેશ આપ્યા છે.
આ ઘટનાએ ફરી એકવાર સાબિત કર્યું છે કે જ્યારે કાયદાના રક્ષકો જ ગુનેગાર માનસિકતા ધરાવતા હોય, ત્યારે સામાન્ય નાગરિકો, ખાસ કરીને મહિલાઓ માટે ન્યાય મેળવવો કેટલો કઠિન બની જાય છે.