બ્રેડફોર્ડ: પાકિસ્તાન દર વર્ષે 5 ફેબ્રુઆરીએ દુનિયા સમક્ષ ‘કાશ્મીર એકતા દિવસ’ મનાવીને કાશ્મીરીઓના હકનો દાવો કરે છે, પરંતુ આ વર્ષે પાકિસ્તાનનો આ દંભ તેની સામે જ ઉલટો પડ્યો છે. બ્રિટનના બ્રેડફોર્ડમાં પાકિસ્તાની કોન્સ્યુલેટની બહાર જ કાશ્મીરીઓએ મોટું વિરોધ પ્રદર્શન કરીને ઇસ્લામાબાદના આતંકવાદી કનેક્શન અને પાકિસ્તાન અધિકૃત જમ્મુ-કાશ્મીર (PoJK) માં થઈ રહેલા અત્યાચારોને દુનિયા સમક્ષ ખુલ્લા પાડી દીધા છે.
‘આ એકતા નહીં, છેતરપિંડી છે’
યુનાઇટેડ કાશ્મીર પીપલ્સ નેશનલ પાર્ટી (UKPNP) ના નેતૃત્વ હેઠળ થયેલા આ વિરોધ પ્રદર્શનમાં કાશ્મીરીઓએ પાકિસ્તાનની ઉજવણીને સખત શબ્દોમાં નકારી કાઢી હતી. UKPNP ના સેક્રેટરી સરદાર તાહિર ખાને કહ્યું કે, "પાકિસ્તાન દ્વારા મનાવવામાં આવતો આ દિવસ કાશ્મીરીઓ સાથે એક મોટી મજાક અને છેતરપિંડી છે. ખરેખર તો આ દિવસને ‘વિશ્વાસઘાત દિવસ’ તરીકે મનાવવો જોઈએ." પ્રદર્શનકારીઓએ "અમારી નદીઓ અમારી છે," અને "જમીન હડપવાનું બંધ કરો" જેવા સૂત્રોચ્ચાર કરીને પાકિસ્તાની સેનાના અત્યાચારનો વિરોધ કર્યો હતો.
સંસાધનોનું શોષણ અને ઓળખ ભૂંસવાનો પ્રયાસ
સભાને સંબોધતા JKNIA ના અધ્યક્ષ મહમૂદ અહેમદ કાશ્મીરીએ ગંભીર આરોપ લગાવ્યા કે પાકિસ્તાન જાણીજોઈને કાશ્મીરી ઓળખને ભૂંસી રહ્યું છે અને ત્યાંના કુદરતી સંસાધનોનું ગેરકાયદેસર શોષણ કરી રહ્યું છે. તેમણે 22 ઓક્ટોબર 1947ના કાળા દિવસને યાદ અપાવ્યો હતો, જ્યારે પાકિસ્તાને આદિવાસી લડવૈયાઓ અને સૈનિકો મોકલીને જમ્મુ-કાશ્મીરમાં લોહીની નદીઓ વહાવી હતી. કાશ્મીરી નેતાઓના મતે, છેલ્લા 78 વર્ષમાં 1 લાખથી વધુ કાશ્મીરીઓએ પાકિસ્તાની દમનને કારણે જીવ ગુમાવ્યા છે.
ભારતમાં તિરંગા લહેરાયો, LoC પર શાંતિના નારા
એક તરફ પાકિસ્તાન પ્રચારમાં વ્યસ્ત હતું, ત્યારે બીજી તરફ ભારતીય જમ્મુ-કાશ્મીરમાં માહોલ સાવ અલગ હતો. LoC નજીકના વિસ્તારો અને શ્રીનગરમાં રહેવાસીઓએ ભવ્ય તિરંગા રેલીઓ કાઢીને ભારત પ્રત્યેનો પોતાનો અતૂટ વિશ્વાસ વ્યક્ત કર્યો હતો. સ્થાનિકોએ રાષ્ટ્રગીત ગાઈને પાકિસ્તાનના દાવાઓને સ્પષ્ટપણે ફગાવી દીધા હતા અને પ્રદેશમાં થઈ રહેલા વિકાસને આવકાર્યો હતો.
આમ, જે દિવસનો ઉપયોગ પાકિસ્તાન ભારતને બદનામ કરવા માટે કરવા માંગતું હતું, તે જ દિવસે પાકિસ્તાન પોતે જ આંતરરાષ્ટ્રીય સ્તરે એકલું પડી ગયું છે અને તેના પોતાના જ લોકોએ તેની પોલ ખોલી નાખી છે.