મુંબઈ:તાજેતરમાં ચાંદીના ભાવમાં આવેલા તીવ્ર ઘટાડાએ રોકાણકારોમાં ફાળ પાડી દીધી હતી કે શું કોમોડિટી માર્કેટની તેજીનો અંત આવી ગયો છે? પરંતુ 29 જાન્યુઆરી થી 4 ફેબ્રુઆરી દરમિયાનના ભંડોળ પ્રવાહના ડેટા તપાસતા માલૂમ પડે છે કે આ કોઈ લાંબા ગાળાની મંદીના સંકેત નથી, પણ માત્ર એક ટેકનિકલ કરેક્શન (સુધારો) છે. રોકાણકારોએ બજારમાંથી પીછેહઠ કરવાને બદલે માત્ર નફો બુક કરીને પોતાની પોઝિશન એડજસ્ટ કરી છે.
   ડેટા દર્શાવે છે કે ત્રણ અઠવાડિયામાં ચાંદીના ભંડોળમાંથી આશરે $2.9 બિલિયન ઉપડી ગયા હતા, પરંતુ હવે પવન બદલાયો છે. ચાલુ સપ્તાહમાં ફરી $1.5 બિલિયનનો નવો પ્રવાહ જોવા મળ્યો છે. નિષ્ણાતોના મતે ચાંદીના ભાવ ખૂબ જ ટૂંકા ગાળામાં ઘણા વધી ગયા હતા, તેથી દબાણ આવતા જ ભાવ નીચે આવ્યા હતા, જે તંદુરસ્ત બજાર માટે સ્વાભાવિક છે.
 રસપ્રદ વાત એ છે કે જ્યારે ચાંદી અને સોનામાં નફાખોરી થઈ રહી છે, ત્યારે એનર્જી સેક્ટરમાં રોકાણકારોનો આશાવાદ આસમાને છે. એનર્જી ઈક્વિટી ફંડ્સમાં $4 બિલિયનનું રોકાણ આવ્યું છે, જે સપ્ટેમ્બર 2008 પછીની સૌથી મોટી સાપ્તાહિક ખરીદી છે. આ દર્શાવે છે કે રોકાણકારો હજુ પણ ફુગાવા સંબંધિત સંપત્તિઓમાં વિશ્વાસ ધરાવે છે.
 ભારત-કેન્દ્રિત ભંડોળ માટે પણ સારા સમાચાર છે. સતત છ અઠવાડિયા સુધી ચાલેલી વેચવાલી બાદ ભારતીય ફંડ્સમાં $67 મિલિયનનો સાધારણ પ્રવાહ પાછો ફર્યો છે. ખાસ કરીને અમેરિકા સ્થિત ETF  દ્વારા કરવામાં આવેલી ખરીદીએ ભારતીય બજારને ટેકો આપ્યો છે. જોકે, ચૂંટણી બાદના પ્રવાહને જોતા બજાર અત્યારે 'થોભો અને રાહ જુઓ' ની સ્થિતિમાં છે. એકંદરે, વૈશ્વિક સ્તરે ડૉલર સામે કોમોડિટીઝમાં રોકાણ કરવાનું વલણ હજુ અકબંધ છે. ચાંદીમાં આવેલો ઘટાડો એક ટૂંકા ગાળાનો વિરામ માત્ર છે, કોઈ મોટી મંદીની શરૂઆત નહીં.