છેલ્લા 8 દિવસમાં સૌથી લોકપ્રિય હેં...વારાણસીમાં ભાજપનો પરાજય 9:51 AM
દીકરીનું હિન્દુ નામ રાખનારા વિવેક રામાસ્વામીને ટ્રોલ કરવામાં આવ્યા
અમેરિકામાં રહેતાં ઈન્ડિયન્સ માટે હવે પોતાના સંતાનનું હિન્દુ નામ રાખવું પણ જાણે ગુનો હોય તેમ આ બાબતે પણ હવે તેમની સામે નફરત ફેલાવવામાં આવી રહી : ફેબ્રુઆરી ૦૪ના રોજ ત્રીજા સંતાનના પિતા બનેલા વિવેકે દીકરીનું નામ સાવિત્રી રાખ્યું
ન્યુયોર્ક,તા.૦૭: અમેરિકામાં રહેતાં ઈન્ડિયન્સ માટે હવે પોતાના સંતાનનું હિન્દુ નામ રાખવું પણ જાણે ગુનો હોય તેમ આ બાબતે પણ હવે તેમની સામે નફરત ફેલાવવામાં આવી રહી છે. એક સમયે ડોનલ્ડ ટ્રમ્પના ખાસ માણસ કહેવાતા અને ઓહાયોના ગવર્નર પદની ચૂંટણી લડવાની તૈયારી કરી રહેલા વિવેક રામાસ્વામી પણ આ જ પ્રકારના ટ્રોલિગ અથવા નફરતનો ભોગ બન્યા છે કારણકે તેમણે તાજેતરમાં જ અવતરેલી પોતાની દીકરીનું નામ સાવિત્રી રાખ્યું છે. વિવેકની પત્ની અપૂર્વાએ ફેબ્રુઆરી ૦૪ના રોજ ત્રીજા સંતાનને જન્મ આપ્યો હતો, તેમને બે દીકરા છે અને હવે આ કપલને ત્યાં દીકરી થઈ છે.
રામાસ્વામીએ સોશિયલ મીડિયા પર આ ન્યૂઝ શેર કરતા પોતાની દીકરીનું નામ જણાવ્યું હતું તેમજ એક ફેમિલી ફોટોગ્રાફ પણ પોસ્ટ કર્યો હતો. જોકે, તેમની આ પોસ્ટ પર કમેન્ટ કરનારા ઘણા લોકોએ વિવેકે પોતાની દીકરીનું હિન્દુ નામ રાખવા બદલ તેમની ઝાટકણી કાઢી છે. કહેનારાએ તો તેમને આડે હાથ લેતા એવા પણ ટોણા માર્યા છે કે આ માણસ ભલે અમેરિકામાં જન્મ્યો હોય પરંતુ તે ના તો અમેરિકન છે કે ના તો ઈન્ડિયન છે.
વિવેક રામાસ્વામીએ જે ફેમિલી ફોટોગ્રાફ એક્સ પર શેર કર્યો છે તેને ૩.૩ મિલિયનથી પણ વધારે વ્યૂ મળ્યા છે અને આઠ હજારથી પણ વધુ લોકોએ તેના પર કમેન્ટ કરી જ્યારે આ ફોટોગ્રાફને એક લાખથી વધુ લોકો દ્વારા લાઈક કરવામાં આવ્યો છે. વિવેકના દીકરાઓના નામ પણ કાર્તિક અને અર્જુન છે. જોકે, બંને દીકરાના જન્મ વખતે વિવેક રામાસ્વામી પબ્લિક લાઈફમાં નહોતા પણ દીકરીના જન્મ વખતે તેઓ અમેરિકાનો ચર્ચાસ્પદ ચહેરો બની ચૂક્યા છે.
તેમની પોસ્ટ પર કમેન્ટ કરનારા ઘણા લોકોએ તેમને સીધો સવાલ કર્યો છે કે શું તમને દીકરી માટે કોઈ અમેરિકન નામ ના મળ્યું? કેટલાકે તો સાવિત્રી, એટલે વળી શું તેમજ આવા નામનો તો ઉચ્ચાર કરવો પણ મુશ્કેલ છે તેવી કમેન્ટ કરી છે. વિવેકની પોસ્ટ પર જે કમેન્ટ્સ આવી છે તેના પરથી અમુક યુઝરે એવું લખ્યું છે કે અમેરિકન્સને ઈન્ડિયન્સથી સિરિયસ પ્રોબ્લેમ હોય તેવું લાગે છે.
વિવેકની પોસ્ટ પર આકરી પ્રતિક્રિયા આપનારા અમુક હેન્ડલ્સને સપોર્ટ કરનારા લોકોએ વિવેકનું મોઢું જોતા જ ગુસ્સો આવે છે, ભગવાન અમેરિકાને ઈન્ડિયન્સથી બચાવો એવી કમેન્ટ્સ પણ કરી છે. એક યુઝરે તો એવી પણ કમેન્ટ કરી હતી કે જેમ યુકે પર ઈન્ડિયન્સે કબજો જમાવી લીધો છે તેવી જ રીતે હવે અમેરિકાના પણ એવા જ હાલ થશે.
વિવેક રામાસ્વામી આ પહેલા પણ ઘણીવાર ટ્રોલર્સના નિશાને આવી ચૂક્યા છે, ખાસ તો H-1B વિઝાની તરફેણ કરવા ઉપરાંત હિન્દુ તહેવારોની ઉજવણી કરવા બાબતે MAGA સપોર્ટર્સ દ્વારા તેમની આકરા શબ્દોમાં ટીકા કરવામાં આવી છે અને અમુકવાર વિવેકે પોતાને ટ્રોલ કરનારા લોકોને તેમની જ ભાષામાં જવાબ પણ આપ્યા છે. જોકે, હવે તેમની ન્યૂ બોર્ન બેબી ગર્લના નામ પર જે રીતે તેમને ટ્રોલ કરવામાં આવી રહ્યા છે તે દર્શાવે છે કે અમેરિકામાં ઈન્ડિયન્સ સામે કયા પ્રકારનો માહોલ ઉભો કરવામાં આવી રહ્યો છે.
(10:15 AM IST)
