એથેન્સ: દુનિયાભરના પ્રવાસીઓ માટે આકર્ષણનું કેન્દ્ર ગણાતા ગ્રીસે તેના ઐતિહાસિક સ્મારકો અને સંગ્રહાલયોમાં થતી ભીડને નિયંત્રિત કરવા માટે એક ક્રાંતિકારી પગલું ભર્યું છે. ગ્રીસના સંસ્કૃતિ મંત્રાલય દ્વારા 'હેલેનિક હેરિટેજ' (hh.gr) નામનું નવું ઓનલાઈન પોર્ટલ લોન્ચ કરવામાં આવ્યું છે. 1 એપ્રિલથી અમલમાં આવનારી આ સિસ્ટમ દ્વારા પ્રવાસીઓ વિશ્વપ્રસિદ્ધ 'એક્રોપોલિસ' સહિત 100 થી વધુ પુરાતત્વીય સ્થળો માટે અગાઉથી ટિકિટ બુક કરાવી શકશે.
ગ્રીસના વડાપ્રધાન કિરિયાકોસ મિત્સોટાકિસે આ પ્રોજેક્ટ રજૂ કરતા જણાવ્યું હતું કે, ગત વર્ષે માત્ર એક્રોપોલિસ માટે જ 30 લાખ જેટલી ઇલેક્ટ્રોનિક ટિકિટો ઈશ્યુ કરવામાં આવી હતી. આ નવા પોર્ટલનો હેતુ માત્ર ભીડ ઘટાડવાનો જ નથી, પરંતુ પ્રવાસીઓ ગ્રીક સંસ્કૃતિને ઊંડાણપૂર્વક સમજી શકે તે માટે તેમને 8 અલગ-અલગ ભાષાઓમાં 350 થી વધુ સાઈટ્સની માહિતી પૂરી પાડવાનો પણ છે. વર્ષ 2024માં ગ્રીસમાં વિક્રમી 4.07 કરોડ પ્રવાસીઓ આવ્યા હતા અને 2025માં પણ આ આંકડો વધવાની શક્યતા છે.
નવા પોર્ટલમાં દિવ્યાંગ વ્યક્તિઓ માટે ખાસ સુવિધા રાખવામાં આવી છે, જેમાં ટિકિટ બુકિંગ સમયે જ લિફ્ટ કે વ્હીલચેરની સુવિધા પસંદ કરી શકાશે. જોકે, ટ્રાવેલ ઓપરેટરોએ ચિંતા વ્યક્ત કરી છે કે માત્ર બે મહિનાના ટૂંકા ગાળામાં જૂની સિસ્ટમને નવી સાથે જોડવી પડકારજનક રહેશે. તેમ છતાં, ગ્રીસ સરકારનો આ પ્રયાસ પ્રવાસન ઉદ્યોગને વધુ વ્યવસ્થિત અને આધુનિક બનાવશે તે નક્કી છે.
 
નવા બુકિંગ પોર્ટલની ખાસિયતો:
•    સીધું બુકિંગ: પ્રવાસીઓ એપ્રિલથી સીધું જ hh.gr પર જઈને લાઈનમાં ઉભા રહ્યા વગર ટિકિટ મેળવી શકશે.
•    રિયલ-ટાઈમ ડેટા: ટૂર ઓપરેટરો જાણી શકશે કે કયા સ્મારક પર કયા સમયે કેટલી જગ્યા ખાલી છે, જેથી ગ્રુપ બુકિંગ સરળ બનશે.
•    સાંસ્કૃતિક જોડાણ: પોર્ટલ પર માત્ર ટિકિટ જ નહીં, પણ ગ્રીસના ભવ્ય ઈતિહાસ વિશેની વિગતો પણ મળી રહેશે.