મુંબઈ: મુંબઈની ઉપનગરીય રેલવે એટલે કે 'મુંબઈ લોકલ' ટૂંક સમયમાં નવા અને આધુનિક સ્વરૂપમાં જોવા મળશે. મુંબઈ રેલવે વિકાસ કોર્પોરેશન (MRVC) દ્વારા મુંબઈ અર્બન ટ્રાન્સપોર્ટ પ્રોજેક્ટ (MUTP) ના ફેઝ III અને III-A અંતર્ગત ૨૩૮ વંદે મેટ્રો એસી લોકલ ટ્રેનો ખરીદવાની પ્રક્રિયા તેજ કરી દેવામાં આવી છે. આ પ્રોજેક્ટ હેઠળ કુલ ૨,૮૫૬ કોચ મુંબઈના રેલવે નેટવર્કમાં સામેલ કરવામાં આવશે, જે મુંબઈગરાની દરરોજની હાડમારી ભરેલી મુસાફરીને આરામદાયક અને સુરક્ષિત બનાવશે.
આ નવી વંદે મેટ્રો ટ્રેનો ૧૨ કોચની ફોર્મેશનમાં હશે, જેને જરૂરિયાત મુજબ ૧૫ કે ૧૮ કોચ સુધી વધારી શકાશે. પ્રથમ પ્રોટોટાઈપ રેક આગામી ૨.૫ વર્ષમાં મળવાની અપેક્ષા છે, ત્યારબાદ સફળ પરીક્ષણ બાદ તેનું પૂર્ણ ઉત્પાદન શરૂ થશે. આ ટ્રેનોની મહત્તમ ઝડપ ૧૩૦ કિમી પ્રતિ કલાક હશે, જે ઝડપી એક્સિલરેશન અને બ્રેકિંગ સિસ્ટમને કારણે સ્ટેશનો વચ્ચેનો મુસાફરીનો સમય ઘટાડશે.
મુસાફરોની સુરક્ષા માટે આ ટ્રેનોમાં ઓટોમેટિક સ્લાઈડિંગ દરવાજા, સીસીટીવી કેમેરા, ઈમરજન્સી ટોક-બેક સિસ્ટમ અને અગ્નિશમન માટે આધુનિક સ્મોક ડિટેક્શન સિસ્ટમ હશે. આ ઉપરાંત, ટ્રેનની અંદરનું તાપમાન મુસાફરોની ભીડ મુજબ આપોઆપ એડજસ્ટ થશે. આધુનિક ઈન્ફોટેનમેન્ટ સિસ્ટમ, યુએસબી ચાર્જિંગ પોર્ટ અને વાઈ-ફાઈ જેવી ડિજિટલ સુવિધાઓ પણ મુસાફરોને મળશે. ખાસ કરીને મુંબઈના ભેજવાળા અને દરિયાઈ વાતાવરણને ધ્યાનમાં રાખીને આ ટ્રેનોને કાટ-પ્રતિરોધક (corrosion-resistant) કોટિંગ સાથે તૈયાર કરવામાં આવશે.
 
વંદે મેટ્રોની મુખ્ય વિશેષતાઓ:
•    વધુ સ્પેસ: અંડરસ્લંગ ઈક્વિપમેન્ટને કારણે કોચમાં મુસાફરોને ઉભા રહેવા માટે વધુ જગ્યા મળશે.
•    આધુનિક સીટ: મુસાફરો માટે આરામદાયક કુશનવાળી મોડ્યુલર સીટોની વ્યવસ્થા.
•    સુરક્ષા કવચ: ઓટોમેટિક દરવાજા ફૂટબોર્ડ પર મુસાફરી કરવાનું જોખમ ટાળશે.
•    સ્માર્ટ ક્લાઈમેટ કંટ્રોલ: રિયલ-ટાઈમ પેસેન્જર લોડ મુજબ તાજી હવાની અવરજવર અને તાપમાનનું નિયમન.