પટના:બિહારની રાજધાની પટનાના એક હોસ્ટેલમાં NEET ની તૈયારી કરી રહેલી વિદ્યાર્થીની સાથે દુષ્કર્મ અને ત્યારબાદ તેની હત્યાના મામલે આખા દેશમાં રોષ ફાટી નીકળ્યો છે. આ કેસમાં પીડિત પરિવારને ન્યાય અપાવવા માટે અવાજ ઉઠાવનાર સાંસદ પપ્પુ યાદવની ધરપકડ કરવામાં આવતા મામલો વધુ ગૂંચવાયો છે. કોંગ્રેસના નેતા રાહુલ ગાંધી અને પ્રિયંકા ગાંધી વાડ્રાએ આ ધરપકડને 'રાજકીય વેરની રાજનીતિ' અને સરકારની 'અસંવેદનશીલતા' ગણાવીને બિહાર સરકાર તેમજ ભાજપ પર આકરા પ્રહારો કર્યા છે.
પ્રિયંકા ગાંધીએ સોશિયલ મીડિયા પર સરકારને ઘેરતા સવાલ કર્યો હતો કે, "જ્યારે કોઈ દીકરી સાથે આટલી ઘૃણાસ્પદ ઘટના બને છે, ત્યારે સરકાર ન્યાય આપવાને બદલે અવાજ ઉઠાવનારા નેતાઓની ધરપકડ કેમ કરી રહી છે? શું સરકાર આડકતરી રીતે આરોપીઓને બચાવવાનો પ્રયાસ કરી રહી છે?" રાહુલ ગાંધીએ પણ આ ઘટનાને લોકશાહી અને ન્યાય પ્રણાલી માટે કલંક સમાન ગણાવી છે. વિપક્ષનો આરોપ છે કે બિહારમાં ગુનેગારોને મોકળું મેદાન મળી ગયું છે અને જનતાનો અવાજ દબાવવામાં આવી રહ્યો છે.
બીજી તરફ, પપ્પુ યાદવની ધરપકડ બાદ પટનામાં તણાવભરી સ્થિતિ સર્જાઈ છે. તેમના સમર્થકો મોટી સંખ્યામાં રસ્તા પર ઉતરી આવ્યા છે અને સરકાર વિરોધી સૂત્રોચ્ચાર કરી રહ્યા છે. પોલીસનું કહેવું છે કે કાયદો અને વ્યવસ્થા જાળવી રાખવા માટે આ પગલું ભરવામાં આવ્યું છે, પરંતુ વિપક્ષ આને ન્યાયના માર્ગમાં અવરોધ ગણાવી રહ્યો છે. આ ઘટનાએ ૨૦૨૬ના રાજકીય માહોલમાં બિહાર સરકારની કામગીરી પર અનેક સવાલો ઉભા કરી દીધા છે