લંડન: ભારતમાંથી કરોડો રૂપિયાનું કૌભાંડ કરી ભાગી ગયેલા હીરાના વેપારી મેહુલ ચોક્સીને બ્રિટનની હાઈકોર્ટે જોરદાર ફટકો માર્યો છે. કોર્ટે ચોક્સીને તેના કથિત અપહરણના મામલે ચાલી રહેલા સિવિલ મુકદ્દમામાં ખર્ચ પેટે સુરક્ષા (Security for Costs) તરીકે £૬૭૭,૦૦૦ (અંદાજે ૮ કરોડ રૂપિયા) જમા કરાવવાનો આદેશ આપ્યો છે. આ આદેશ બાદ હવે ચોક્સીએ જો આ કેસ આગળ ચલાવવો હશે તો આ તોતિંગ રકમ કોર્ટમાં જમા કરાવવી અનિવાર્ય બનશે.
મેહુલ ચોક્સીએ આરોપ લગાવ્યો હતો કે વર્ષ ૨૦૨૧માં એન્ટિગુઆ અને બાર્બુડાથી તેનું અપહરણ કરીને બળજબરીથી ડોમિનિકા લઈ જવામાં આવ્યો હતો. આ કથિત ષડયંત્ર માટે તેણે ભારત સરકાર અને અન્ય પાંચ વ્યક્તિઓ સામે યુકેમાં દાવો માંડ્યો હતો. જોકે, હાઈકોર્ટના કિંગ્સ બેન્ચ ડિવિઝને નોંધ્યું હતું કે ચોક્સી આ કેસમાં જીતે તેવી શક્યતા ઘણી ઓછી છે. પ્રતિવાદીઓએ એવી દલીલ કરી હતી કે જો ચોક્સી આ કેસ હારી જાય, તો તેમની કાનૂની ફી અને અન્ય ખર્ચ વસૂલવા માટે ચોક્સી પાસેથી પૂરતી સુરક્ષા હોવી જોઈએ.
ન્યાયાધીશે પોતાના ચુકાદામાં સ્પષ્ટ કહ્યું કે, આ મામલે એવું કોઈ મજબૂત કારણ જણાતું નથી કે જેનાથી માની શકાય કે ચોક્સીનો પક્ષ સાચો છે. કોર્ટે એવો પણ ભય વ્યક્ત કર્યો હતો કે જો ચોક્સી કેસ હારી જાય તો તે વિરોધ પક્ષના કાયદાકીય ખર્ચની ચુકવણી કરવામાં નિષ્ફળ જઈ શકે છે. ભારત સરકારે શરૂઆતથી જ અપહરણના આ તમામ આરોપોને પાયાવિહોણા ગણાવીને ફગાવી દીધા છે. હવે ૮ કરોડની આ ડિપોઝિટ મેહુલ ચોક્સી માટે મોટી મુસીબત બની શકે તેમ છે.
 
કેસની મહત્વની વિગતો:
•    કુલ રકમ: £૬૭૭,૦૦૦ (ભારતીય ચલણમાં આશરે ૮ કરોડ રૂપિયા).
•    મુખ્ય આરોપ: ૨૦૨૧માં એન્ટિગુઆથી ડોમિનિકા બળજબરીથી લઈ જઈ અપહરણ અને હુમલો કરવાનો દાવો.
•    પ્રતિવાદીઓ: ભારત સરકાર અને બ્રિટનમાં રહેતા અન્ય પાંચ લોકો.
•    કોર્ટનું અવલોકન: કેસમાં સફળતાની શક્યતા ઘણી ઓછી હોવાથી ડિપોઝિટ ભરવી ફરજિયાત.